News Flash

भिवंडीतील दुर्घटनाग्रस्त इमारतीतील मृतांच्या कुटुंबियांना ५ लाखांची मदत

पालकमंत्री एकनाथ शिंदे यांनी दिली माहिती; दुर्घटनेची चौकशी होणार असल्याचेही सांगितले

भिवंडीतील पटेल कंपाउंड येथील जीलानी ही तीन मजली इमारत कोसळून मृत्युमुखी पडलेल्यांच्या कुटुंबियांना ५ लाख रुपयांची मदत राज्य शासनाच्यावतीने देण्यात येणार असल्याचे ठाण्याचे पालकमंत्री एकनाथ शिंदे यांनी जाहीर केले. आज (सोमवार) पहाटे पावणे चार वाजेच्या सुमारास ही इमारत कोसळून १० जणांचा मृत्यू झाला, तर किमान ३० ते ३५ जण ढिगाऱ्याखाली अडकले असल्याची भीती व्यक्त होत आहे.

इमारत कोसळल्याचे वृत्त समजताच पालकमंत्री शिंदे यांनी घटनास्थळी धाव घेतली. एनडीआरएफची एक तुकडी, ठाणे महापालिकेच्या आपत्कालीन विभागाची तुकडी, ठाणे आपत्ती प्रतिसाद दल आणि भिवंडी अग्निशमन दलाचे जवान पहाटेपासून मदतकार्यात गुंतले असून ढिगाऱ्याखाली अडकलेल्यांना बाहेर काढण्याचे काम सुरू आहे. जखमींना महापालिकेच्या इंदिरा गांधी रुग्णालयात दाखल करण्यात आले असून, शिंदे यांनी तिथेही भेट देऊन जखमींची विचारपूस केली, तसेच उपचारांबाबत डॉक्टरांकडून माहिती घेतली.

या दुर्घटनेची चौकशी करण्यात येईल, असे पालकमंत्री शिंदे यांनी जाहीर केले. भिवंडी महापालिकेने शहरातील १०२ धोकादायक इमारती रिकाम्या केल्या असून अशा प्रकारच्या इमारतींचा आढावा सातत्याने प्रशासनाकडून घेतला जातो, असेही शिंदे यांनी सांगितले आहे.

या दुर्घटनेतील मृत व्यक्तींमध्ये १) झुबेर खुरेशी(३० वर्ष) २)फायजा खुरेशी(५वर्ष) ३)आयशा खुरेशी(७वर्ष) ४)बब्बू(२७वर्ष) ५) फातमा जुबेर बबु (२वर्ष),६) फातमा जुबेर कुरेशी (८वर्ष),७) उजेब जुबेर (६ वर्ष),८) असका आबिद अन्सारी (१४ वर्ष),९) अन्सारी दानिश अलिद (१२ वर्ष)
१०) सिराज अहमद शेख (२८ वर्ष) यांचा समावेश आहे.

भिवंडी येथील इमारत दुर्घटनेबद्दल मुख्यमंत्री उद्धव ठाकरे यांनी दुःख व्यक्त केलं असून मृतांच्या कुटुंबीयांप्रती संवेदना प्रकट केल्या आहेत. मुख्यमंत्री ठाकरे पालकमंत्री एकनाथ शिंदे यांच्याशी देखील बोलले असून बचाव कार्य व्यवस्थित व काळजीपूर्वक पार पाडण्याचे तसेच जखमींवर योग्य उपचार करण्याचे निर्देश त्यांनी प्रशासनाला दिले आहेत.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on September 21, 2020 12:50 pm

Web Title: 5 lakh assistance to the families of the victims of the bulding accident in bhiwandi msr 87
Next Stories
1 काळाचा घाला! भिवंडीत तीन मजली इमारत कोसळली, दहा जणांचा मृत्यू
2 डोंबिवलीत १०६ वर्षांची महिला करोनामुक्त
3 १०६ वर्षांच्या आजीबाईंची करोनावर यशस्वी मात; सोशल मीडियातून कौतुकाचा वर्षाव
Just Now!
X