बदलापूर : दहशतवादी गुन्हे प्रकरणातील आरोपींना ऑनलाईन मार्गदर्शन केल्याचा ठपका ठेवत, उत्तर प्रदेश दहशतवाद विरोधी पथकाने (एटीएस) बदलापुरातून एका डॉक्टरला अटक केल्याची माहिती सूत्रांनी दिली. डॉ. ओसामा म. शेख (२५) असे डॉक्टरचे नाव असून, तो बदलापूर पूर्वेतील एका रुग्णालयात निवासी डॉक्टर म्हणून कार्यरत होता.
बदलापूर शहरात सोमवारी उत्तर प्रदेशमधील दहशतवादी विरोधी पथकाचे पोलीस उपअधीक्षक सुशील सिंग यांच्या नेतृत्वाखालील पथक दाखल झाले. त्यांनी स्थानिक पोलिसांच्या मदतीने बदलापूर पूर्वेतील कात्रप रस्त्यावर एका खासगी रुग्णालयात काम करणाऱ्या डॉ. ओसामा शेख याला अटक केली. परिमंडळ-४चे पोलीस उपायुक्त यांच्या मदतीने एटीएसने ही कारवाई केली.दरम्यान, डॉ. शेख याला उल्हासनगर न्यायालयात हजर केले असता त्याला ८ ऑगस्टपर्यंत पोलीस कोठडी देण्यात आली आहे. यानंतर त्याला उत्तर प्रदेशला रवाना करण्यात आले आहे. आरोपीबाबत किंवा त्याच्या वास्तव्याबाबत अधिकची माहिती मिळू शकलेली नाही. मात्र पुरावे असल्यानेच संबंधित डॉक्टरला अटक करण्यात आल्याची माहिती पोलीस सूत्रांनी दिली आहे.
