कल्याणमध्ये मजूर महिलेच्या मृत्यूप्रकरणी विकासकावर गुन्हा

ओम शिव डेव्हलपर्सचे विकासक मालक प्रमोद तिवारी, योगेश दातीलकर, ठेकेदार योग एन्टरप्रायझेसचे मालक रुपेश पाटील, मजूर पुरवठादार ठेकेदार यांच्यावर महात्मा फुले पोलीस ठाण्यातील उपनिरीक्षक आशीष भगत यांनी गुन्हा दाखल केला आहे. सुजाता साहू असे मृत्यू पावलेल्या महिलेचे नाव आहे. जूनमध्ये ही महिला मजूर इमारतीच्या १५ व्या माळ्यावरून पडून मरण पावली होती.

हेही वाचा – ठाणे: अंतर्मुखता आणि बहिर्मुखता यामध्ये समतोल महत्त्वाचा – डॉ. आनंद नाडकर्णी

पोलिसांनी सांगितले, सुजाता साहू ही महिला आरोपींच्या गृहप्रकल्पावर मजूर म्हणून काम करत होती. इमारतीच्या १५ व्या माळ्यावर बांधकामासाठी बांधलेल्या परांचीवर उभी राहून ती एका गवंड्याला वीट रचई कामाची ओळंब्याच्या साहाय्याने एक ओळीतील कामाची माहिती देत होती. यावेळी परांचीवरील तिचा पाय सटकून ती १५ व्या माळ्यावरून चौथ्या माळ्यावरील स्लॅबवर पडली. तिच्या सर्वांगाला गंभीर जखमा झाल्या होत्या. तिची पायाची हाडे मोडली होती. तिला उपचारासाठी दाखल करण्यापूर्वीच तिचा मृत्यू झाला होता.

हेही वाचा – ठाण्यातील प्रमुख रस्त्यांसह झोपडपट्ट्यांमध्ये कंटनेर शौचालये, ३० ठिकाणी शौचालयांची उभारणीचे काम अंतिम टप्प्यात

पोलिसांनी या प्रकरणाची चौकशी केली. त्यावेळी या निर्माणाधिन इमारतीच्या चारही बाजूने कामगार सुरक्षेसाठी संरक्षित जाळी बांधली नव्हती. मजुरांना शिरस्त्राण, हात, पायमोजे देण्यात आले नसल्याचे निदर्शनास आले. या महिलेच्या मृत्यूला या बांधकामाशी संबंधित मालक, भागीदार, ठेकेदार कारणीभूत आहेत असा निष्कर्ष काढत पोलिसांनी संबंधितांवर गुन्हे दाखल केले आहेत.