बदलापूर रेल्वे स्थानकातील होम फलाटचे काम गेल्या तीन महिन्यांपासून बंद होते. होम फलाटाच्या कामाचे भूमिपूजन ३ वर्षांपूर्वी करण्यात आले आहे. आजतागायत हे काम पूर्ण होऊ शकलेले नाही. याबाबतचे वृत्त लोकसत्तामध्ये प्रकाशित करण्यात आले होते. या बातमीची दखल घेत रेल्वे प्रशासनाने स्थानिक लोकप्रतिनिधींच्या मदतीने काम सुरू करण्यासाठी हालचाली सुरू केल्या आहेत. यासंदर्भात नुकतीच कुळगाव बदलापूर नगर पालिका मुख्यालयात एक बैठक पार पडली. यात रिक्षात थांब्याची एक रांग कमी करून त्या जागी होम फलाटाचे काम सुरू करण्यात आले आहे. बदलापूर रेल्वे स्थानकात प्रवाशांची संख्या दिवसेंदिवस वाढत आहे. या गर्दीला विभागण्यासाठी आणि अरुंद फलाटांवरची गर्दी कमी करण्यासाठी रेल्वे प्रशासनाने बदलापूर रेल्वे स्थानकात होम फलाटाला मंजुरी दिली होती. २०१९च्या लोकसभा निवडणुकीच्या पूर्वी या होम फलाटाचे घाईघाईने भूमिपूजन करण्यात आले. मात्र त्याचे काम सुरू होण्यात मोठा अवधी गेला. तीन वर्षांपासून सुरू असलेले फलाटाचे हे काम विविध कारणांमुळे रखडले होते. सुरुवातीच्या काळात पुनर्वसन आणि जागेच्या विषयांवरून स्थानिक व्यापाऱ्यांनी आक्रमक भूमिका घेतली होती. त्यावर तोडगा काढून झाल्यानंतर या होम फलाटाचे काम सुरू करण्यात आले. गेल्या तीन महिन्यांपासून हे काम पुन्हा पूर्णतः ठप्प झाले होते. पश्चिमेला होम फलाटाच्या जागेत सध्याच्या घडीला रिक्षा थांबा आहे. हा रिक्षा थांबा हटवल्याशिवाय होम फलाटाचे काम सुरू करणे अशक्य होते. याबाबतचे वृत्त लोकसत्तामध्ये नुकतेच प्रकाशित करण्यात आले होते. त्यानंतर केंद्रीय राज्यमंत्री कपिल पाटील आणि कल्याणचे खासदार डॉ. श्रीकांत शिंदे यांनी पुढाकार घेत याबाबत तोडगा काढण्याच्या सूचना रेल्वे आणि पालिका प्रशासनाला दिल्या. त्यानुसार रेल्वेच्या अधिकाऱ्यांनी पालिका अधिकाऱ्यांच्या सोबत फलाटाची पाहणी केली होती. त्यानंतर कुळगाव बदलापूर नगरपालिकेचे मुख्याधिकारी योगेश गोडसे यांच्या समवेत पोलिस, लोकप्रतिनिधी आणि रिक्षा संघटनांचे प्रतिनिधीसोबत संयुक्त बैठक पार पडली. यावेळी रिक्षा थांबा असलेल्या ठिकाणी तीन रांगाऐवजी दोनच रांगा लावण्याची विनंती रिक्षाचालकांना करण्यात आली. ती मागणी मान्य झाल्याने आता त्या जागी होम फलाटाचे काम सुरू करण्यात आले आहे. येत्या काही दिवसात येथील पादचारी पूल आणि तिकीट घराचा प्रश्नही निकाली निघेल. त्यामुळे होम फलाटाच्या कामात सलगता येणार आहे. मुंबई रेल्वे विकास कॉर्पोरेशनच्या वरिष्ठ प्रकल्प अभियंता शुभम श्रीवास्तव यांनी नुकतेच एक पत्र जाहीर करत कंत्राटदाराला होम फलाटचे काम तातडीने सुरु करण्याबाबत आदेश दिले आहेत. यासाठी लागणाऱ्या सर्व सुरक्षेच्या गोष्टींची पूर्तता करण्याचे आदेशही देण्यात आले आहेत. प्रवाशांची गैरसोय टाळून सुरक्षितरित्या काम करण्यावर भर देण्याचे सुचवले आहे. या कामासाठी फलाट क्रमांक तीनच्या पूर्वेकडील मोकळ्या जागेचा वापर करण्याचहा सूचना दिल्या आहेत.