ठाणे – या गणेशोत्सव काळात पर्यावरणाची काळजी घेत सुरक्षित उत्सवावर भर द्यावा. गणेशोत्सवाच्या काळात नागरिकांना कोणत्याही प्रकारचा त्रास होवू नये, यासाठी सर्व यंत्रणांनी कटिबद्ध राहावे. तसेच गणेशोत्सव काळात शांतता आणि सुव्यवस्था राखण्यासाठी पोलीस बंदोबस्त वाढवावा. विशेषतः संवेदनशील ठिकाणी अधिक लक्ष द्यावे. गणेशोत्सवाच्या मिरवणुकांमध्ये रुग्णालय आणि नागरी वस्त्यांच्या जवळून जाताना वाद्यांचा आवाज कमी करावा असे आवाहनही ठाणे जिल्हाधिकारी डॉ. श्रीकृष्ण पांचाळ यांनी केले आहे.
पर्यावरणपूरक गणेशोत्सवाला चालना देण्याच्या दृष्टीने आणि गणेशोत्सवाची पूर्वतयारी यादृष्टीने जिल्हाधिकारी डॉ. श्रीकृष्ण पांचाळ यांच्या अध्यक्षतेखाली जिल्हाधिकारी कार्यालयातील समिती सभागृहात आढावा बैठक संपन्न झाली. त्यावेळी ते बोलत होते.
येत्या २७ ऑगस्टपासून साजरा होणाऱ्या गणेशोत्सवाच्या पार्श्ववभूमीवर जिल्हा प्रशासनाकडून सुरक्षेच्या दृष्टीने तयारी करण्यात येत आहे. विसर्जन मार्गावरील खड्डे प्राधान्याने बुजवावेत आणि मंडप उभारणी करताना रस्त्यांचे नुकसान होणार नाही, याची दक्षता घ्यावी. गणेश मंडळांना आवश्यक परवानग्या देण्यासाठी ‘एक खिडकी’ योजना प्रभावीपणे राबवावी. गणेशोत्सव काळात २४ तास अखंडित वीज पुरवठा सुनिश्चित करावा. गणेश मंडपांसाठी आवश्यक असलेल्या लाईट आणि इलेक्ट्रिक कामांची पाहणी करून धोकादायक वायर्स तात्काळ दुरुस्त कराव्यात. विसर्जन स्थळी सुरक्षा आणि अग्निशमन यंत्रणा सज्ज ठेवावी. बंद पडलेल्या गाड्यांमुळे वाहतुकीची कोंडी होवू नये म्हणून तात्काळ त्या हटविण्याचे नियोजन करण्याचे जिल्हा प्रशासनाच्या वतीने संबंधित यंत्रणांना आदेश देण्यात आले आहे. याच समवेत ध्वनी आणि जल प्रदूषण टाळण्यासाठी विशेष खबरदारी घ्यावी. नागरिकांना शाडूच्या मातीच्या मूर्ती खरेदी करण्याचे आवाहन करावे आणि त्या उपलब्ध करण्यासाठी विशेष व्यवस्था करावी. पर्यावरणपूरक गणेशोत्सवासाठी सोशल मीडिया आणि इतर माध्यमांद्वारे जनजागृती मोहीम राबवावी. मंडळांमध्ये आणि सार्वजनिक ठिकाणी पर्यावरणपूरक गणेशोत्सवाचे महत्त्व सांगणारी पत्रके वाटपाचे निर्देशही जिल्हाधिकाऱ्यांनी दिले आहेत.
गर्दीच्या ठिकाणांवर आणि महत्त्वाच्या विसर्जन स्थळांवर तात्पुरते कृत्रिम तलाव तयार करावेत. गणेश मूर्तींची विटंबना होणार नाही, याची विशेष काळजी घ्यावी. कचरा व्यवस्थापनाचे योग्य नियोजन करून प्रत्येक विसर्जन स्थळी स्वच्छता राखणे आवश्यक आहे. प्रत्येक विसर्जन स्थळी निर्माल्य जमा करण्यासाठी स्वतंत्र व्यवस्था करावी आणि ते योग्य ठिकाणी कंपोस्टिंगसाठी पाठवण्याचे आवाहन ही जिल्हाधिकाऱ्यांनी केले आहे. उत्सवादरम्यान संभाव्य आरोग्य समस्या लक्षात घेऊन वैद्यकीय पथकांनी सज्ज राहावे. हवामान खात्याने अतिवृष्टीचा इशारा दिल्यास निर्माण होणाऱ्या परिस्थितीचा सामना करण्यासाठी आपत्कालीन उपाययोजना तयार ठेवण्यात याव्या.
