Ganeshotsav 2025 : जिंका २५ ते ५ हजारांपर्यंतची बक्षिसे, ठाणे महापालिका गणेशोत्सव आरास स्पर्धा

सार्वजनिक उत्सव मंडळांकडून गणेशोत्सवानिमित्ताने विविध सामाजिक संदेश देणाऱ्या विषयांवर आधारित देखावे उभारण्यात येतात. तसेच अनेक संस्थांप्रमाणेच ठाणे महापालिकेकडून गणेशोत्सव आरास स्पर्धेचे आयोजन करण्यात येते. यंदाही ठाणे महापालिका क्षेत्रातील सार्वजनिक गणेशोत्सव मंडळांसाठी ठाणे महानगरपालिकेतर्फे आरास स्पर्धा आयोजित करण्यात आली आहे. सार्वजनिक गणेशोत्सव आरासस्पर्धेत सहभागी सर्व मंडळांना महापालिकेने निर्धारीत केलेल्या अटी व शर्ती लागू राहतील, असे पालिकेने स्पष्ट केले आहे.

या स्पर्धेत देखावा, मूर्तीकार आणि स्वच्छता यांच्यासाठी स्वतंत्र पारितोषिके असणार आहेत. शुक्रवारपासून महापालिका मुख्यालय येथे अर्ज उपलब्ध होणार आहेत.अशी नोंदणी करावीया स्पर्धेत भाग घेऊ इच्छिणाऱ्या संस्थांना तसेच गणेशोत्सव मंडळांना अर्ज दिला जाणार आहे. ठाण्यातील पाचपाखाडी भागतील ठाणे महापालिका भवनमधील माहिती व जनसंपर्क विभाग येथे शुक्रवार १ ऑगस्ट, २०२५ पासून सकाळी ११ ते १.३० आणि दुपारी २.३० ते ५ या वेळेत (सुट्टीचे दिवस वगळून) अर्ज दिले जाणार आहेत. अर्ज स्वीकारण्याची अंतिम तारीख गुरूवार, १४ ऑगस्ट, २०२५ अशी आहे. या मुदतीनंतर आलेले अर्ज स्वीकारले जाणार नाहीत, असे पालिकेने स्पष्ट केले आहे.

अशी असणार पारितोषिके

ठाणे महापालिकेतर्फे घेतल्या जाणाऱ्या या स्पर्धेत देखावा-आरास, स्वच्छता आणि मूर्तीकार असे तीन विभाग आहेत. आरास गटातील विजेत्यांना स्पर्धकांना २५ हजार रुपयांचे पहिले, २० हजार रुपयांचे दुसरे तर, १५ हजार रुपयांचे तिसरे आणि १० हजार रुपयांचे उत्तेजनार्थ अशी रोख पारितोषिके, सन्मानचिन्ह आणि प्रशस्तीपत्र देण्यात येईल. तसेच, मूर्तीकार आणि स्वच्छता या गटातील विजेत्यांना प्रत्येक गटासाठी १० हजार रुपयांचे पहिले, ०७ हजार रुपयांचे दुसरे तर ०५ हजार रुपयांचे तिसरे रोख पारितोषिक, सन्मानचिन्ह व प्रशस्तीपत्र देण्यात येईल.

पालिकेचे आवाहन

या स्पर्धेत सार्वजनिक गणेशोत्सव मंडळांनी मोठ्या प्रमाणावर सहभागी व्हावे असे, आवाहन ठाणे महापालिका आयुक्त सौरभ राव यांनी केले आहे.