कडोंमपाने मालमत्ता कर भरण्याची मुदत वाढविली ; ३१ ऑगस्ट पर्यंत कर भरणाऱ्यांना सवलत

आर्थिक वर्षाच्या पहिल्या सहा महिन्यात जे नागरिक कराची वर्षभराची रक्कम एक रकमी भरणा करतात त्यांना पालिका पाच टक्के करात सवलत देते. ही सवलतीची रक्कम पुढील कर देयकात वळती करुन नागरिकांना त्याचा लाभ मिळतो. यावेळी पालिका संगणकीकरणाच्या ऑनलाईन सेवेत तांत्रिक बिघाड असल्याने नागरिकांना ऑनलाईन कर भरणा करताना, कर भरण्याची पावती मिळताना अनेक अडचणी येत आहेत. त्यामुळे अनेक नागरिकांनी कर भरण्याची मुदत वाढविण्याची पालिकेकडे केली होती. अनेक सोसायट्यांचा लाखो रुपयांचा कर भरणा असतो. ते ही या सवलतीचा सर्वाधिक लाभ घेत असतात.
नागरिकांची मागणी आणि पालिकेतील तांत्रिक अडचणींमुळे प्रशासनाने ३१ जुलै ऐवजी ३१ ऑगस्टपर्यंत नागरिकांना सवलतीत कर भरणा करण्याची सुट दिली. नागरिकांनी ऑनलाईन पध्दतीने कर भरणा करावा. तेथे अडचणी आल्या तर पालिका नागरी सुविधा केंद्रात स्थळ उपस्थितीत रोख, धनादेशाने कर भरणा करावा, असे पालिका मालमत्ता कर विभागाने केले आहे.

मालमत्ता कर विहित वेळेत भरणा केला नाही तर दोन टक्के प्रतिमहा व्याज आकारले जाते. त्यामुळे मालमत्ता कर विहित वेळेत भरणा करुन नागरिकांनी पालिका सवलतीचा लाभ घ्यावा, असे आवाहन प्रशासनाने केले आहे.