ठाणे : ठाणे जिल्ह्यामध्ये ९० च्या दशकात ठाणे शहरांपासून ते थेट वाडा मोखाड्याच्या पाड्यापर्यंत शिवेसना पोहोचवण्याचे काम करणारे दिवंगत शिवसेना ठाणे जिल्हाप्रमुख आनंद दिघे यांचे २३ वर्षांपूर्वी निधन झाले असले तरी त्यांचा मोठा चाहता वर्ग आजही कायम आहे. शिवसेनाप्रमुख बाळासाहेब ठाकरे आणि आनंद दिघे यांना ठाण्यातील शिवसैनिक गुरू मानतात. त्याच आनंद दिघे यांच्याविषयी शिवसेना उद्धव बाळासाहेब ठाकरे पक्षाचे नेते संजय राऊत यांनी वादग्रस्त विधान केले. त्याचे पडसाद ठाण्यात उमटू लागले आहेत. ठाण्यातील शिंदेच्या शिवसेनेतील शिवसैनिक संतप्त होत राऊत यांची प्रतिमा जाळून निषेध नोंदविला.
ठाणे जिल्ह्यामध्ये ९० च्या दशकात ठाणे शहरांपासून ते थेट वाडा मोखाड्याच्या पाड्यापर्यंत शिवेसना पोहोचवण्याचे काम करणारे दिवंगत शिवसेना ठाणे जिल्हाप्रमुख आनंद दिघे यांचे २३ वर्षांपूर्वी निधन झाले. पण, ते हयातीत असतानाही त्यांचा मोठा चाहता वर्ग होता आणि तो निधनानंतरही कायम असल्याचे चित्र सातत्याने दिसून येते. त्यांच्या नावाचा करिष्मा आजही कायम असल्याचे निवडणुकीत दिसून येतो. शिवसेनेत दोन गट पडले पण, दोन्ही गटातील नेते आणि शिवसैनिक मात्र दिघेंना गुरुस्थानी मानतात. शिवसेना म्हणजे ठाणे आणि ठाणे म्हणजे आनंद दिघे असे जणू समिकरणच तयार झाले होते. यातूनच ‘शिवसेनेचा बालेकिल्ला…आनंद दिघेंचा ठाणे जिल्हा’ अशी घोषणा उदयास आली होती. शिवसैनिकांमध्ये त्यांच्याविषयी आदरयुक्त भीती होती. दिघे यांच्याविषयी ठाण्यातील शिवसैनिकांमध्ये नितांत आदर असून यातूनच संजय राऊत यांनी दिघे यांच्याविषयी केल्या वादग्रस्त विधानानंतर त्याचे पडसाद ठाण्यात उमटू लागले आहेत. ठाणे लोकसभा प्रमुख मनोज शिंदे, ठाणे शहर प्रमुख हेमंत पवार, युवा सेनेचे पदाधिकारी नितीन लांडगे यांच्यासह शिवसैनिकांनी राऊत यांच्या प्रतिमेचे टेंभीनाका येथे दहन करत निषेध नोंदविला.
संजय राऊत काय म्हणाले
शिवसेना उद्धव बाळासाहेब ठाकरे पक्षाचे नेते संजय राऊत यांनी शिवसेनेचे दिवंगत नेते आनंद दिघे यांच्याविषयी एक विधान केले आहे. “ शिंदे यांचे नेते मोदी आहेत. तुम्ही बाळासाहेबाच्या बाजुला जिल्हाप्रमुखाचे फोटो लावता. ही कोणती नवी पद्धत आणली. आनंद दिघे हे शिवसेनेचे नेते नव्हते, उपनेते नव्हते, ते ठाण्याचे जिल्हाप्रमुख होते. आनंद दिघे यांचा संपूर्ण आदर ठेवून मी हे बोलत आहे की तुम्हाला बाळासाहेब ठाकरे आणि ठाकरे ब्रँडचे महत्व कमी करायचे आहे म्हणून हे तुम्ही करत आहात का”, असे राऊत यांनी म्हटले आहे.
एकनाथ शिंदे यांचा इशारा
खासदार नरेश म्हस्के आणि पदाधिकारी हेमंत पवार यांनी संजय राऊतांच्या विधानाला प्रतिउत्तर दिले आहे, असे शिंदे म्हणाले. तसेच शिवसेनेचे दिवंगत नेते आनंद दिघे यांच्या कार्याची उंची कोणीही मोजू शकत नाही. त्यांनी आपले संपूर्ण आयुष्य लोकसेवा आणि जनसेवेसाठी समर्पित केले आहे. दिघे यांनी जे समाजकारण केले त्याला तोड नाही. आनंद दिघेंची जे लोक थट्टा करतील, त्यांना आनंद दिघेच चमत्कार दाखवतील,” असे उपमुख्यमंत्री एकनाथ शिंदे यांनी संजय राऊत यांना उद्देशून म्हटले.
