जितेंद्र आव्हाडांना धक्का, अजितदादांना ठेंगा तर भाजपला इशारा; ठाण्यात उपमुख्यमंत्री एकनाथ शिंदे यांची आणखी एक खेळी

कळवा-मुंब्रा विधानसभा मतदारसंघात आव्हाड यांच्या विरोधात अजित पवार यांच्या पक्षाकडून नजीब मुल्ला यांनी निवडणूक लढवली होती. या मतदारसंघात पक्ष वाढीसाठी गेल्या काही महिन्यांपासून आनंद परांजपे आणि मुल्ला यांनी जोरदार प्रयत्न चालवले आहेत. भाजपानेही या भागातील अस्वस्थ नगरसेवकांवर जाळे टाकण्याचा प्रयत्न चालविला होता. ठाणे महापालिका निवडणुकीत एकनाथ शिंदे यांच्या शिवसेना पक्षाला आव्हान उभा करायचा असेल तर कळव्यातून शरद पवार गटाचे नाराज नगरसेवक आपल्या तंबूत यायला हवेत याची अजित पवार आणि भाजपा या पक्षांना जाणीव होती. त्यामुळे आव्हाडांच्या तंबूत असलेले मात्र नाराज असलेल्या नगरसेवकांना कोणत्याही परिस्थितीत जाळ्यात अडकवण्याचा प्रयत्न या दोन्ही गटाकडून सुरू झाला होता. असे असताना एकनाथ शिंदे यांनी या नाराज नगरसेवकांना आपल्या पक्षात घेत अजित पवार आणि भाजपालाही आगामी महापालिका निवडणुकांच्या तोंडावर सूचक असा संदेश दिला आहे.

आमदार जितेंद्र आव्हाड यांचे निकटवर्तीय समजले जाणारे माजी नगरसेवक मिलिंद पाटील, त्यांची पत्नी मनाली पाटील, माजी विरोधी पक्ष नेत्या प्रमिला केणी, महेश साळवी, त्यांच्या पत्नी मनिषा साळवी, सुरेखा पाटील, सचिन म्हात्रे यांच्यासह मंदार केणी पक्षातील काही पदाधिकाऱ्यांनी गुरुवारी सकाळी मुंबईतील मलबार हिल येथील मुक्तागिरी बंगला येथे उपमुख्यमंत्री एकनाथ शिंदे यांच्या उपस्थितीत पक्ष प्रवेश केला. यापुर्वी ज्येष्ठ नगरसेवक हणमंत जगदाळे यांच्यासह आठ नगरसेवकांनी शिंदेच्या शिवसेनेत पक्ष प्रवेश केला होता. त्यामुळे गुरुवारी झालेल्या पक्ष प्रवेशाच्या निमित्ताने ठाणे महापालिका क्षेत्रात शिवसेनेची ताकद वाढल्याचे चित्र आहे.

जितेंद्र आव्हाड आमदार असलेल्या कळवा-मुंब्रा मतदारसंघात भाजपची अवस्था अगदीच तोळामासा आहे. हा मतदारसंघ शिंदे यांचे खासदार पुत्र डाॅ.श्रीकांत यांच्या लोकसभा मतदारसंघाचा भाग आहे. त्यामुळे या ठिकाणचे बहुसंख्य नगरसेवक आपल्या पक्षात कसे येतील यासाठी पद्धतशीर व्युहरचना डाॅ.श्रीकांत आखत होते. ही घडामोड सुरु असताना भाजपनेही या मतदारसंघातील आव्हाड समर्थक नगरसेवकांवर लक्ष केंद्रीत केले होते. कळव्यातही आव्हाड आणि शिंदे अशा दोघांनाही आव्हान उभे करायचे अशी आखणी केली जात होती. मात्र, या नगरसेवकांना आपल्या पक्षात घेऊ पाहणाऱ्या भाजपालाही एक प्रकारचा इशारा दिला आहे.