शरद पवारांनी मुख्यमंत्र्यांच्या कार्यक्रमास उपस्थित राहणे टाळले ? ठाण्यात होणार मुख्यमंत्र्यांच्या चरित्रग्रंथाचा प्रकाशन सोहळा

आगामी लोकसभा आणि विधानसभा निवडणुकीत भाजपचा पराभव करण्यासाठी शिवसेना उद्धव बाळासाहेब ठाकरे, काँग्रेस आणि राष्ट्रवादी या पक्षांच्या महाविकास आघाडीने रणनिती आखली आहे. त्याचाच एक भाग म्हणून महाविकास आघाडीने राज्यभरात वज्रमुठ सभा घेण्यास सुरुवात केली आहे. असे असतानाच, काँग्रेस नेते राहुल गांधी यांनी स्वातंत्र्यवीर सावरकर यांच्याविषयी केलेल्या विधानानंतर उद्धव ठाकरे यांनी नाराजी व्यक्त केली होती. तसेच उद्योगपती गौतम अदानी प्रकरणाची जेपीसी चौकशी, ईव्हीएमचा मुद्दा आणि पंतप्रधान नरेंद्र मोदींच्या पदवीचा विषय यावरून काँग्रेसने भाजपची कोंडी करण्यास सुरुवात केली आहे. नेमकी त्या उलट भुमिका राष्ट्रवादीचे पक्ष अध्यक्ष शरद पवार यांनी घेतली आहे. यावरुनच महाविकास आघाडीत विसंवादाचे सुर असल्याचे चित्र आहे. या पार्श्वभूमीवर उद्धव ठाकरे यांनी शरद पवार यांची भेट घेऊन त्यांच्याशी चर्चा केल्याचे वृत्त समोर आले होते. असे असतानाच, राज्याचे मुख्यमंत्री एकनाथ शिंदे यांच्या चरित्रग्रंथाचा प्रकाशन सोहळ्यास शरद पवार यांना उपस्थित राहण्याचे निमंत्रण आयोजकांनी दिले आहे. परंतु पवार यांनी या कार्यक्रमाला उपस्थित राहणे टाळल्याचे समजते.

हेही वाचा… धुळ प्रदुषण करणाऱ्यांवर होणार दंडात्मक कारवाई; ठाणे महापालिकेची नवी नियमावली

राज्याचे मुख्यमंत्री एकनाथ शिंदे यांचा आजवरचा जीवनप्रवास शब्दबद्ध करण्यात आलेल्या ‘योद्धा कर्मयोगी : एकनाथ संभाजी शिंदे’ या प्रा. डॉ. प्रदीप ढवळ लिखित चरित्रग्रंथाचा प्रकाशन सोहळा मंगळवारी ठाण्यात आयोजित करण्यात आला आहे. या चरित्रग्रंथाच्या प्रकाशनासाठी महाराष्ट्राचे राज्यपाल रमेश बैस, राज्याचे उपमुख्यमंत्री देवेंद्र फडणवीस, माजी मुख्यमंत्री पृथ्वीराज चव्हाण, ज्येष्ठ साहित्यिक पद्मश्री मधु मंगेश कर्णिक, ठाण्याचे पालकमंत्री शंभूराज देसाई, खासदार डॉ. श्रीकांत शिंदे यांच्या हस्ते होणार आहे. या सोहळ्यासाठी आयोजकांनी शरद पवार यांना उपस्थित राहण्याचे निमंत्रण दिले होते. परंतु या कार्यक्रमाच्या दुसऱ्याच दिवशी पवार हे कर्नाटक येथे निवडणुक प्रचारासाठी जाणार आहेत. या कार्यक्रमाला उपस्थित राहिल्यास वेग‌ळा संदेश जाण्याबरोबरच महाविकास आघाडीत विसंवाद वाढण्याची शक्यता लक्षात घेऊन त्यांनी कार्यक्रमाला येणे टाळल्याचे सुत्रांकडून समजते.

हेही वाचा… ठाण्यात मुख्यमंत्री एकनाथ शिंदे यांच्या चरित्रग्रंथाचा प्रकाशन सोहळा ;राज्यपाल, उपमुख्यमंत्री यांच्यासह विविध क्षेत्रांतील मान्यवर राहणार उपस्थित

राज्याचे मुख्यमंत्री एकनाथ शिंदे यांच्या चरित्रग्रंथाचा प्रकाशन सोहळ्यास शरद पवार यांना उपस्थित राहण्याचे निमंत्रण दिले होते. या कार्यक्रमाला उपस्थित राहणे आवडले असते पण, व्यस्त कार्यक्रमामुळे उपस्थित राहणे शक्य नसल्याचे त्यांनी सांगितले. त्यांनी तारिख पुढे ढकलण्यास सांगितले होते. परंतु मुख्यमंत्री शिंदे यांच्या आईचा स्मृती दिन १८ एप्रिलला असल्यामुळे आम्ही त्याच दिवशी हा कार्यक्रम करायचे ठरविले होते. त्यामुळे कार्यक्रमाची तारीख बदलणे शक्य नव्हते, अशी माहिती चरित्रग्रंथाचे लेखन डॉ. प्रदीप ढवळ यांनी ठाण्यातील पत्रकार परिषदेत बोलताना सांगितले.