लोणी खाणाऱ्याची हंडी दोन महिन्यांनी फोडणार; शिवसेनेच्या माजी नगराध्यक्षाच्या वक्तव्याने पुन्हा चर्चा

हेही वाचा >>> डोंबिवली जवळील रुणवाल गार्डन, पलावा येथे वाहनांच्या काचा फोडल्या

अंबरनाथ शिवसेनेचे विद्यमान आमदार डॉ.बालाजी किणीकर आणि माजी नगराध्यक्ष अरविंद वाळेकर यांच्यात गेल्या अनेक वर्षांपासून अंतर्गत संघर्ष सुरु आहे. गेल्या काही दिवसांपासून हा संघर्ष तीव्र झाला आहे. सुरूवातीला शहराला पाणीपुरवठा करणाऱ्या चिखलोली धरणावरून तर शहरात वारंवार खंडीत होणाऱ्या वीज पुरवठ्यावरून हा संघर्ष पेटला होता. मध्यंतरीच्या काळात वाळेकर यांनी किणीकर यांचे नाव न घेता शेलक्या शब्दात टिका केली होती. त्यामुळे विधानसभेच्या पूर्वीच दोघांमधील संघर्ष पेटल्याचे चित्र होते. त्यातच आता दहीहंडी कार्यक्रमात वाळेकरांनी अशाच प्रकारे वक्तव्य केल्याने अनेकांच्या भूवया उंचावल्या आहेत.

हेही वाचा >>> माजी पोलीस महासंचालक संजय पांडे यांच्याविरोधात गुन्हा दाखल

अंबरनाथ पूर्वेतील छत्रपती शिवाजी महाराजा चौकात दरवर्षीप्रमाणे यंदाही अरविंद वाळेकरांच्या माध्यमातून दहीहंडीचे आयोजन करण्यात आले होते. यावेळी त्यांनी उपस्थितांशी संवाद साधताना दहीहंडच्या थरांवरून एक वक्तव्य केले आहे. लोणी खाणाऱ्या व्यक्तीला खालच्या थराचा विसर पडला आहे. हंडी फोडण्यासाठी खालचा थर मजबूत लागतो. पण हे विसणाऱ्याला त्याची जागा लवकरच दाखवली जाईल. येत्या दोन महिन्यात लवकरच एक हंडी फोडायची आहे. यासाठी तयार राहा आणि आपला खालचा थर मजबूत करा. तर हे जे विसरले आहेत त्यांना एकच सांगायचे आहे की आमचा नाद करायचा नाही, असा इशाराच यावेळी अरविंद वाळेकर यांनी दिला. शहरातील राजकीय वर्तुळात वाळेकर सहसा किणीकर यांच्यावरच टीका करतात. त्यामुळे ही टीकाही आमदार डॉ. किणीकर यांच्यावरच केली असल्याची चर्चा रंगली आहे.