हिरानंदानी अर्ध मॅरेथॉनमध्ये दहा हजार स्पर्धक धावले

मी धावतो नव्या जीवनासाठी..असा संदेश देत ठाण्यातील दहा हजार मॅरेथॉनप्रेमी रविवारी हिरानंदनी अर्ध मॅरेथॉनच्या निमित्ताने ठाण्यातील रस्त्यावर धावले. उत्साही वातावरण, मान्यवरांचे प्रोत्साहन आणि सामाजिक बांधिलकीचा प्रयत्न या वैशिष्टय़ाने नटलेल्या या स्पर्धेसाठी शहरातील अबालवृद्ध उपस्थित होते. हिरानंदनी इस्टेट येथून सुरू झालेल्या या मॅरेथॉनच्या २१ किमीच्या स्पर्धेत अनिल पवार विजेता ठरला. हिरानंदनी कंन्स्ट्रक्शन कंपनीचे एमडी निरज हिरानंदानी यांच्या हस्ते विजेत्यांचा गौरव करण्यात आला.  
या मॅरेथॉनचे आणखी एक वैशिष्ट म्हणजे या मॅरेथॉनच्या प्रवेश शुल्कातुन मिळालेला निधी कर्करोग रुग्णांसाठी देण्यात आली. यावेळी ठाण्याचे खासदार राजन विचारे आणि महापौर संजय मोरे उपस्थित होते. य्२१ किमीची अर्ध मॅरेथॉन, १० किमीची ग्रीन मॅरेथॉन, ४ किमीची ड्रीम मॅरेथॉन आणि ३ किमीची जुनिअर रन अशा चार विभागामध्ये ही स्पर्धा आयोजित करण्यात आली होती. यामध्ये सुमारे १० हजार स्पर्धकांनी सहभाग घेतला होता. २१ किमीच्या स्पर्धेमध्ये अनिल पवार यांनी विजेतेपद तर एल. बालचंद्र याने द्वितीय क्रमांक व सुनिल प्रसाद यांनी तृतीय क्रमांक पटकावला. सामाजिक बांधिलकीच्या दृष्टीने या स्पर्धेमध्ये सहभागी होण्यासाठी भरलेली नोंदणी शुल्क सामाजिक संस्थांना देण्यात आले. या उपक्रमाच्या माध्यमातून प्राप्त निधी आक्सफेम इंडिया, बुनियाद आणि कॅन्सर फाऊंडेशन ऑफ इंडिया यांना देण्यात आला. या स्पध्रेच्या निमित्ताने सहभागी नागरिकांपैकी सुमारे २ हजार जणांनी अवयवदानाचा संकल्प सोडला. वेगवान जीवनशैलीमध्ये आरोग्याची काळजी घेण्याचा संदेश देण्यात आला. कामाच्या ताणतणावामध्ये आरोग्याकडे दुर्लक्ष होत असल्याने नागरिकांनी जागृत राहण्याचे आवाहन केले.