Rain Updates : ठाणे : संपूर्ण ठाणे जिल्ह्यात पावसामुळे नागरिकांची दैना उडाली असताना आता रस्त्यांची अवस्था नाल्याप्रमाणे झाली आहे. घोडबंदर मार्गावर गायमुख घाट ते कासारवडवली पर्यंत वाहनांच्या रांगा लागल्या आहेत. मुंबई नाशिक महामार्गावर माणकोली पूलाखाली पाणी साचल्याने महामार्गावर कोंडी झाली आहे. तर मुंब्रा बाह्यवळण मार्गावरही कोंडी झाल्याने वाहन चालकांचे हाल झाले. अनेक खासगी कंपन्यांतील नोकरदारांना सुट्टी जाहीर असतानाही कोंडी झाल्याने आश्चर्य व्यक्त केले जात आहे.
ठाणे जिल्ह्यात मुसळधार पावसाने अक्षरशः थैमान घातले असून नागरिकांचे जनजीवन पूर्णपणे विस्कळीत झाली आहे. काही दिवसांपासून सुरु असलेल्या जोरदार पावसामुळे शहरातील मुख्य रस्ते आणि महामार्ग पाण्याखाली गेले आहेत. रस्त्यांची अवस्था इतकी दयनीय झाली आहे की, हे रस्ते नालेच बनले की काय असा प्रश्न नागरिक विचारू लागले आहेत. विशेषतः घोडबंदर मार्गावर तर नागरिकांची चांगलीच परिक्षा पाहायला मिळाली. गायमुख घाटापासून कासारवडवलीपर्यंत वाहनांच्या लांबच लांब रांगा लागल्याने प्रवाशांचा जीव अक्षरशः हैराण झाला. कार्यालयात कामानिमित्ताने निघालेल्या नोकरदारांना तासन् तास एका जागी थांबावे लागले. पावसाच्या पाण्यामुळे रस्त्यांवर खड्डे पडले असून, गाड्यांची चाके चिखलात अडकण्याचे प्रकार मोठ्या प्रमाणावर घडले.
मुंबई-नाशिक महामार्गाची परिस्थिती देखील काही वेगळी नाही. माणकोली पुलाखाली प्रचंड पाणी साचल्याने महामार्गावर मोठ्या प्रमाणावर कोंडी झाली आहे. महामार्गावर लांबपर्यंत वाहनांच्या रांगा लागल्या असून, अनेक वाहनचालकांना पर्यायी मार्ग शोधावा लागला. पावसामुळे साचलेल्या पाण्यात वाहनं बंद पडत असल्याने महामार्गावर गोंधळाचे वातावरण तयार झाले.
मुंब्रा बाह्यवळण मार्गावरही कोंडीची परिस्थिती पाहायला मिळाली. या रस्त्यावर मोठ्या प्रमाणात कोंडी झाली असून, नागरिक अक्षरशः हालअपेष्टा सहन करत आहेत. अनेक खासगी कंपन्यांनी कर्मचाऱ्यांना घरून काम करण्याचा पर्याय देत सुट्टी जाहीर केली होती. मात्र तरीदेखील रस्त्यावर इतक्या मोठ्या प्रमाणावर कोंडी झाली की, नागरिक आश्चर्य व्यक्त करत आहेत. ठाणे बेलापूर मार्गावरील दिघा रेल्वे स्थानक परिसरातही रस्त्यावर पाणी साचल्याने नवी मुंबईहून ठाणे गाठणाऱ्या दुचाकी, कार चालकांचे हाल झाले.
