रुग्णवाहिकांचा भाडे गोंधळ संपणार; भाडे वाद टाळण्यासाठी रुग्णवाहिकांचा अधिकृत दर जाहीर

रुग्णालयांच्या आणि इतर रुग्णवाहिकांकडून रुग्ण आणि त्यांच्या नातेवाईकांकडून जादा भाडे आकारल्याच्या घटना गेल्या काही वर्षांत वाढल्या आहेत. गंभीर आजार किंवा अपघाताच्या प्रसंगी, आधीच तणावाखाली असलेल्या कुटुंबीयांना रुग्णवाहिका चालकांशी होणाऱ्या भाड्यावरील वादामुळे अधिक मानसिक त्रासाला सामोरे जावे लागते. अशा परिस्थितीत रुग्णवाहिका ही केवळ वाहतूक साधन नसून, जीव वाचविण्यासाठीची पहिली महत्त्वाची कडी आहे; त्यामुळे या सेवेत पारदर्शकता आणि शिस्त राखणे अत्यावश्यक आहे. याच पार्श्वभूमीवर मुंबई महानगर क्षेत्र परिवहन प्राधिकरणाने रुग्णवाहिकांच्या भाडेदरांचे स्पष्ट निकष आखून दिले आहेत आणि ते दरपत्रकाच्या स्वरूपात प्रत्येक रुग्णवाहिकेच्या आतील बाजूस लावणे हे चालक व मालक यांच्यासाठी अनिवार्य केले आहे. दरपत्रकामुळे नागरिकांना प्रवासापूर्वीच नेमका खर्च माहित होईल आणि कोणत्याही प्रकारच्या गैरसमजाला वाव उरणार नाही.

विविध प्रकारच्या रुग्णवाहिकांसाठी वेगवेगळे भाडेदर निश्चित केले गेले आहेत. यामध्ये मारुती व्हॅनसाठी २५ किलोमीटर अथवा दोन तासांपर्यंत ७०० रुपये व त्यानंतर प्रति किलोमीटर १४ रुपये; टाटा सुमो व मॅटॅडोरसदृश वाहनांसाठी २५ किलोमीटर किंवा दोन तासांपर्यंत ८४० रुपये व पुढील अंतरासाठी प्रति किलोमीटर १४ रुपये; टाटा ४०७, स्वराज माझ्दा यांसारख्या साच्यावरील वाहनांसाठी २५ किलोमीटर अथवा दोन तासांपर्यंत ९८० रुपये आणि नंतर प्रति किलोमीटर २० रुपये; तर आयसीयू सुविधा असलेल्या किंवा वातानुकुलित रुग्णवाहिकांसाठी २५ किलोमीटर अथवा दोन तासांपर्यंत ११९० रुपये व त्यानंतर प्रति किलोमीटर २४ रुपये अशी संरचना ठरवण्यात आली आहे. या भाडेदरांमध्ये रुग्ण बसल्यापासून रुग्णालयापर्यंत व परतीच्या प्रवासाचे अंतर समाविष्ट आहे. २५ किलोमीटरच्या पुढील प्रवासासाठी ठराविक दरांनुसार मूळ भाड्यात वाढ केली जाते, तसेच पहिल्या एका तासाच्या प्रतिक्षेसाठी कोणतेही शुल्क नसून त्यानंतर प्रत्येक प्रतिक्षा तासासाठी ५० रुपये. अधिकृत दरांपेक्षा कमी भाडे किंवा मोफत सेवा देण्यास परवानगी आहे; परंतु निश्चित दरांपेक्षा जास्त आकारणी करण्यास मनाई आहे.