बदलापूरमध्ये अनधिकृत फेरीवाल्यावर कारवाईदरम्यान वादंग; मराठी भाषेबाबत अपशब्द काढल्याच्या आरोपानंतर मनसेची धडक

बदलापुरात गेल्या काही दिवसांपासून फेरीवाल्यांची संख्या वाढली आहे. शहरातील विविध रस्ते फुटपाथ फेरीवाल्यांनी गिळंकृत केले आहेत. या फेरीवाल्यांमुळे रहदारीला त्रास होत असून रस्त्यावर वाहतुकीची कोंडी वाढत आहे. यातील बहुतांश फेरीवाले हे शहराबाहेरून येत असून ते या शहरातून आपला व्यवसाय करत आहेत. यासाठी बहुतांश फेरीवाल्यांना स्थानिक राजकीय पुढार्यांचा फायदा मिळत असल्याचं बोललं जात आहे.

काही दिवसांपूर्वी एका भाजप नगरसेवकाने हे फेरीवाल्यांचं रॅकेट होतं असं म्हणत यामागे मोठा आर्थिक गैरवव्यवहार होत असल्याचा आरोप केला होता. ही समस्या दिवसेंदिवस वाढत असल्याने नगरपालिकेने आपली अतिक्रमण विरोधी कारवाई तीव्र केली होती याच पार्श्वभूमीवर सोमवारी सकाळपासून नगरपालिकेने अनधिकृत फेरीवाल्यांविरुद्ध कारवाईची मोहीम आरंभली होती.

दिवसभर पालिकेची कारवाई सुरू होती. यात अनेक यात अनेक फेरीवाले हटवण्यात आले. ही फेरीवाले हटाव मोहीम बदलापूर पश्चिम येथे सुरू असताना येथील ट्रेंड्स या मोठ्या दुकानासमोर एका हातगाडी वाल्याला हातगाडी हटवण्यासाठी पालिका कर्मचाऱ्यांनी सांगितले मात्र त्याने हातगाडी हटवली नाही. उलट हा फेरीवाला पालिका कर्मचाऱ्यांची हुज्जत घालू लागला.

यावेळी फेरीवाला आणि त्याचे सहकारी पालिका कर्मचाऱ्यांवर धावून गेले तसेच त्यांनी शिवी गाळी देखील केली. तसेच या फेरीवाल्याने मराठी भाषेबद्दल अवमानकारक वक्तव्य केले अशी माहिती पालिका कर्मचाऱ्यांनी दिली. याची माहिती बदलापूर शहरात वाऱ्यासारखी पसरली आणि मनसे कार्यकर्त्यांनी संबंधित फेरीवाल्याला गाठून त्याचा मनसे स्टाईल समाचार घेतला. या घटनेनंतर मनसे पुन्हा एकदा आक्रमक भूमिका घेताना दिसली. परप्रांतीय फेरीवाल्यांच्या विरोधात मनसेने स्पष्ट संदेश दिला आहे की मराठी भाषा आणि संस्कृतीचा अवमान सहन केला जाणार नाही.

पालिकेचे मुख्याधिकारी मारुती गायकवाड यांनी या प्रकरणाची गंभीर दखल घेतली असून, संबंधित फेरीवाल्याविरुद्ध शासकीय कामात अडथळा आणल्याचा गुन्हा दाखल करण्याचे आदेश दिले आहेत. त्याचबरोबर शहरातील सर्व अनधिकृत फेरीवाल्यांविरुद्ध कारवाई सुरूच राहील, असा स्पष्ट इशारा गायकवाड यांनी दिला.

या कारवाईनंतर नगरपालिकेच्या भूमिकेला पाठिंबा देणारे आवाज उमटत आहेत, तर दुसरीकडे फेरीवाल्यांविषयी कडक धोरणामुळे सामाजिक वातावरण आणखी पेट घेण्याची भीती काहींनी व्यक्त केली आहे.

मराठी फेरीवाल्यांनाच हटवण्याचा आरोप

बदलापूर नगरपालिकेच्या या फेरीवाला हटाव मोहिमे विरोधात काही मराठी फेरीवाल्यांनी नाराजी व्यक्त केली. नगरपालिकेंनी काही परप्रांतीय फेरीवाल्यांना न हटवता केवळ मराठी फेरीवाल्यांनाच हटवण्याचा आरोप या फेरीवाल्यांनी केला. तर काही सर्वेक्षण झालेल्या फेरीवाल्यांवर कारवाई केल्यामुळे त्यांनी पालिकेवर संताप देखील व्यक्त केला.