जगातील १० शक्तिशाली देशांमध्ये भारताचा नंबर कितवा? आनंद महिंद्रांची पोस्ट व्हायरल; म्हणाले, “आता जबाबदारी…”

वर्ल्ड ऑफ स्टॅटिस्टिक्स (@stats_feed) ने एक्सवर जगातील सर्वात १० शक्तिशाली देशांची यादी शेअर केली आहे. ऑस्ट्रेलियाच्या लोवी इन्स्टिट्यूटच्या २०२४ एशिया पॉवर इंडेक्सद्वारे ही यादी तयार करण्यात आली आहे. यात आशियातील २७ देशांचे विविध पॅरामीटर्सच्या आधारे मूल्यमापन करण्यात आले आहे, ज्यात सर्व देशांमधील आर्थिक स्थिती आणि लष्करी क्षमता, भविष्यातील संसाधने, आर्थिक भागीदारी, संरक्षण नेटवर्क, राजनैतिक प्रभाव आणि सांस्कृतिक प्रभावाच्या आधारे त्यांचे मूल्यमापन करण्यात आले. या यादीनुसार जगातील सर्वात शक्तिशाली देश अमेरिका आहे, तर दुसऱ्या क्रमांकावर चीन आहे.

भारताचा नंबर कितवा?

या यादीनुसार भारत जगातील तिसरा सर्वात शक्तिशाली देश आहे. भारताच्या वर अमेरिका आणि चीन आहेत; त्यानंतर जपान, रशिया, ब्रिटन, जर्मनी, दक्षिण कोरिया, फ्रान्स आणि ऑस्ट्रेलिया आहेत. या यादीवर आता उद्योगपती आनंद महिंद्रा यांनी एक्सवर एक पोस्ट केली आहे, ज्यात त्यांनी लिहिले आहे की, “शक्ती देश बनवण्याबरोबर आता जबाबदारीदेखील तितक्याच जास्त असणार आहेत.”

आनंद महिंद्रा यांची ही पोस्ट काही तासांतच दीड लाखांहून अधिक लोकांनी पाहिली, तर मोठ्या संख्येने लोकांनी त्यावर प्रतिक्रिया दिल्या आहेत. एकाने लिहिले की, “रशियाचा क्रमांक भारत आणि जपानच्या वर असावा असे मला वाटते.” दुसऱ्या एकाने लिहिले की, “भारत टॉप ३ मध्ये पोहोचणे हा त्याच्या वाढत्या जागतिक प्रभावाचा पुरावा आहे.” तिसऱ्याने लिहिले की, “येत्या दहा वर्षांत चीन अमेरिकेला मागे टाकू शकतो.” आणखी एकाने लिहिले की, “काही वर्षांत या यादीत मोठे बदल दिसून येतील.” अजून एकाने लिहिले की, भारत टॉप ३ मध्ये आहे याचा खूप अभिमान आहे, आपण चीन आणि अमेरिकेलाही मागे टाकू. शेवटी एका युजरने म्हटले की, “चीनकडे भरपूर पैसा आहे, परंतु तो देश कधीच जागतिक स्तरावर कोणत्याही युद्धात अडकत नाही, ही एक चांगली रणनीती आहे.”