अनेकदा खाजगी कंपन्यांमध्ये बॉस किंवा मॅनेजर कर्मचाऱ्यांवर दबाव टाकत असल्याच्या घटना समोर येतात. अशा परिस्थितीत कंपनी व्यवस्थापनावर नाराज होत बॉस किंवा मॅनेजरला मारहाण केल्याची प्रकरणं क्वचित समोर येतात. नुकतेच असेच एक प्रकरण समोर आले आहे, जे पाहून तुम्हालाही धक्का बसेल. हे प्रकरण बेंगळुरूमधील आहे, जिथे कर्मचाऱ्यांनी भाड्याने गुंड आणून मॅनेजरला मारहाण केली आहे. धक्कादायक गोष्ट म्हणजे गुंडांनी भररस्त्यात मॅनेजरला रॉड अन् लाथाबुक्क्यांनी मारहाण केली. ही घटना सुरू असताना रस्त्यावरून अनेक गाड्या ये-जा करत होत्या, पण कोणीही गुंडांना थांबवण्यासाठी पुढे आले नाही. या हल्ल्यात मॅनेजर गंभीररित्या जखमी झाला आहे, ज्याचा व्हिडीओ सोशल मीडियावर मोठ्या प्रमाणात व्हायरल होत आहे.

समोर आलेल्या माहितीनुसार, गुंडांनी मारहाण केलेला मॅनेजर हाताखाली असलेल्या कर्मचाऱ्यांना त्रास देत कामाच्या बाबतीत दबाव टाकत होता. इतकेच नाही तर कर्मचाऱ्यांना सुट्टी देण्यास टाळाटाळ करत होता. यावेळी मॅनेजरच्या त्रासाला कंटाळून कर्मचाऱ्यांनी भाड्याने गुंड नेमून मारहाण केली. गुंडांनी मॅनेजरला भररस्त्यात रॉडने मारहाण केली, ज्याचा व्हिडीओ सध्या सोशल मीडियावर व्हायरल होत आहे. मारहाणीनंतर मॅनेजरने आपल्या कर्मचाऱ्यांवर संशय व्यक्त केला आहे.

आणखी वाचा

पोलिसांनी कर्मचाऱ्यांना ताब्यात घेऊन चौकशी केली असता त्यांनी गुन्ह्याची कबुली दिली. पोलिसांनी त्यांच्यावर कारवाई करत मारहाणीचा गुन्हा दाखल करून त्यांना अटक केली. याप्रकरणी पुढील कार्यवाही सुरू आहे. त्याचबरोबर आरोपींनी हल्ल्याचे कारणही पोलिसांना सांगितले आहे.