“पाकिस्तानात मोदींचं प्रचंड वेड..”, भारतात परतलेल्या अंजुचा अनुभव, म्हणाली, “ते लोक मला नेहमी मोदींचे..”

राजस्थानमधील ३४ वर्षीय अंजू राफेल या मुलीने जुलै महिन्यात पाकिस्तानात पळून जाऊन तिच्या फेसबुकवरील मित्राशी लग्नगाठ बांधली होती. हे लग्न झाल्यानंतर अंजू चर्चेत आली होती. २९ नोव्हेंबरला अंजुने भारतात आल्यावर मोदींच्या लोकप्रियतेबाबत खास भाष्य केले. अंजुने सांगितले की, ” पाकिस्तानातील लोकांना मोदी प्रचंड आवडतात, अगदी मोदींसारखाच एखादा नेता त्यांना त्यांच्याही केंद्र सरकारमध्ये हवा आहे.”

टाइम्स नाऊ व नवभारतला दिलेल्या मुलाखतीत अंजुने सांगितलं की, पाकिस्तानातील तिचा ‘फेसबुक फ्रेंड’ नसरुल्ला याच्याबरोबर राजकारणाशी संबंधित कुठल्याच गोष्टीवर गप्पा किंवा चर्चा झाली नाही पण पाकिस्तानात वास्तव्याला असताना तिथल्या जनतेच्या मनातील मोदींविषयीचे कुतुहूल व प्रेम तिने पाहिले आहे. पाकिस्तानी लोकांना मोदींच्या विषयी जाणून घेण्यात खूपच रस होता. ते अंजुला नेहमी मोदींशी संबंधित प्रश्न विचारायचे असेही ती म्हणाली. इतकंच नाही तर मोदींसारखा नेता पाकिस्तानात असता तर आज पाकिस्तानचा सुद्धा विकास झाला असता असेही तिथले लोक म्हणतात असं अंजुने सांगितलं.

हे ही वाचा<< ४९० कोटींचं लग्न लागताच आता नवरदेवाला २५ वर्षं तुरुंगवासाची शिक्षा होणार? पूर्ण प्रकरण जाणून व्हाल थक्क

दरम्यान, अंजु आणि नसरुल्ला एकत्र राहणार का? अंजुच्या मुलांचा नसरुल्ला स्वीकार करणार का हे सर्व काही नंतर ठरवलं जाईल असं तिने मुलाखतीत सांगितलं. शिवाय मी पाकिस्तानात कायदेशीर पद्धतीनेच गेले होते, मी काही पाकिस्तानला प्रवास करणारी पहिली व्यक्ती नाही, लोकांनी मी माझ्या मुलांना टाकून पळून गेले अशा कहाण्या बनवल्या आहेत. माझ्या मुलांना नसरुल्ला विषयी आधीच माहित होतं आणि त्यांच्यात अनेकदा संभाषण सुद्धा झालं होतं. माझा हेतू शुद्ध होता आणि विनाकारण माझी बदनामी करण्याचा प्रयत्न केला जात आहे असेही अंजुने म्हटले आहे.