Ganesh Idol Immersion Viral Video: देशभरात गणेशोत्सव मोठ्या उत्साहात, धूमधडाक्यात साजरा झाल्यानंतर आता गणेश विसर्जनाचे दृश्य समोर येत आहेत. कुठे ढोल-ताशांच्या गजरात शोभायात्रा काढली जातेय, तर कुठे नदी-तलावांच्या काठावर भक्त आपल्या विघ्नहर्त्याला डोळ्यांत पाणी आणून निरोप देत आहेत. परंपरेनुसार बाप्पाला जलसमर्पण करून भक्त हसत-हसत, रडत-रडत निरोप देतात. मात्र, यंदा सोशल मीडियावर व्हायरल झालेल्या एका व्हिडीओने सर्वत्र संतापाची लाट उसळली आहे.
संतापजनक प्रकार आला समोर!
या व्हिडीओमध्ये काही तरुण मंडळी गणेशमूर्तीला थेट पुलावरून खाली फेकताना दिसतात. विसर्जन म्हणजे विधी-विधानाने, श्रद्धेने केलेली देवाची निरोपयात्रा; पण या प्रकाराने अनेकांना धक्का बसला आहे. मूर्ती पाण्यात अलगद सोडण्याऐवजी थेट पुलावरून टाकण्यात आली आणि ती खाली आपटताच आजूबाजूचे लोक स्तब्ध झाले.
भक्तांच्या भावना दुखावल्या
गणपती हा घराघरांतला, प्रत्येकाच्या श्रद्धेचा विषय. बाप्पाच्या विसर्जनावेळी डोळ्यात पाणी येते, गळा दाटतो. अशावेळी काही जणांनी मूर्तीला पुलावरून फेकल्याचा हा प्रकार पाहून लोक संतप्त झाले आहेत. सोशल मीडियावर एकच चर्चा सुरू झाली आहे, “ही भक्ती आहे की बेफिकिरी?” अनेकांनी हा प्रकार श्रद्धेचा अपमान असल्याचे म्हटले, तर काहींनी तो थेट परंपरेवर घाला असल्याचं सांगितलं.
धोकादायक आणि अयोग्य पद्धत
धर्म, श्रद्धा आणि संस्कृती या सगळ्याचं प्रतिनिधित्व करणाऱ्या गणपती बाप्पाचं विसर्जन अशा बेफिकीर पद्धतीने केल्याने केवळ धार्मिक भावनाच दुखावत नाहीत, तर मोठा धोका निर्माण होतो. पुलावरून मूर्ती टाकताना जर ती खालील नावेत किंवा एखाद्या व्यक्तीवर पडली असती तर मोठा अपघात घडला असता, असं नागरिकांचं म्हणणं आहे.
नेमका कुठे घडलाय हा प्रकार?
हा धक्कादायक व्हिडीओ नेमका कुठल्या शहरातला आहे, याबाबत अद्याप निश्चित माहिती समोर आलेली नाही. तरीदेखील हा व्हिडीओ सोशल मीडियावर जोरात व्हायरल होत आहे. फेसबुक, व्हॉट्सअॅप आणि इन्स्टाग्रामवर यावर संतप्त प्रतिक्रिया उमटत आहेत.
विसर्जनाची खरी शिकवण
गणेशोत्सव म्हणजे भक्ती, एकोपा आणि संस्कृतीचं प्रतीक. विसर्जन म्हणजे बाप्पाला आदरपूर्वक, सन्मानाने जलसमर्पण करणे. या उत्सवात भक्तीसोबत पर्यावरण आणि सुरक्षिततेचीही जबाबदारी महत्त्वाची असते. पण, पुलावरून मूर्ती फेकण्याच्या प्रकाराने समाजात प्रश्नचिन्ह उभं केलं आहे, “आपण खरोखर परंपरेचं पालन करतोय की फक्त दिखावा?”
येथे पाहा व्हिडीओ
(टीप : या वृत्तातील सर्व माहिती सोशल मीडिया स्रोतांवर आधारित आहे. त्यातील कोणत्याही प्रकारच्या दाव्याची लोकसत्ता पुष्टी करीत नाही.)
