Train viral video: जम्मू आणि काश्मीरमधील अनंतनाग जिल्ह्यात शनिवारी सकाळी एक अत्यंत दुर्मीळ आणि आश्चर्यकारक अपघात घडला. बारामुल्ला-बनिहालदरम्यानच्या मार्गावर धावणाऱ्या ट्रेनच्या विंडस्क्रीनवर अचानक एक गरुड आदळले. या धडकेमुळे विंडस्क्रीन तुटली आणि लोको पायलट जखमी झाला.
व्हायरल व्हिडीओमध्ये अपघाताची भीषणता दिसून येते. व्हिडीओमध्ये जखमी गरुड आणि ट्रेनचा लोको पायलट दिसत आहे. अधिकार्‍यांच्या माहितीनुसार, हा अपघात बिजबेहारा आणि अनंतनाग रेल्वेस्थानक यादरम्यान घडला. ट्रेन सामान्य वेगाने धावत असताना, लोको पायलटने अचानक ब्रेक लावला, ज्यामुळे प्रवाशांना काही क्षण धक्का बसल्याचे जाणवले आणि गोंधळ निर्माण झाला. नंतर स्पष्ट झाले की, एक गरुड ट्रेनच्या इंजिनच्या समोरच्या काचेवर जोरात आदळले आणि त्याची काचही तुकड्यांमध्ये तुटून पडली.
जखमी लोको पायलटचे नाव विशाल, असे आहे. त्याला तातडीने वैद्यकीय मदत मिळाली आणि उपचारादरम्यान काचेचे तुकडे त्याच्या मानेतून सुरक्षितपणे काढले गेले. सुदैवाने ट्रेनमधील सर्व प्रवासी सुरक्षित होते आणि कोणालाही गंभीर दुखापत झाली नाही. अपघातानंतर गरुड इंजिनाच्या आत पडल्याचे सांगितले जात आहे.
सोशल मीडियावर हा व्हिडीओ प्रचंड प्रमाणात शेअर केला जात आहे. काही प्रतिक्रियांमध्ये लोकांनी लोको पायलटच्या धैर्याचे कौतुक केले आहे, तर काहींनी प्रवाशांच्या सुरक्षिततेबद्दल चिंता व्यक्त केली आहे. काही लोकांनी गरुडबद्दल सहानुभूती व्यक्त केली आहे आणि प्राणी संरक्षणाच्या दृष्टिकोनातून या घटनेची चर्चा केली आहे.
पाहा व्हिडिओ
सोशल मीडियावर व्हायरल होणारा हा व्हिडीओ या एक्स @jisiyaram अकाउंटवरून शेअर करण्यात आला आहे. अपघातानंतर रेल्वे अधिकाऱ्यांनी ताबडतोब अंतर्गत चौकशी सुरू केली आहे, ज्यामध्ये ट्रेनच्या ट्रॅकची सुरक्षितता आणि इंजिनाची स्थिती तपासली जाईल. या प्रकारचे अपघात या मार्गावर अत्यंत दुर्मीळ आहेत. त्यामुळे हा प्रकार स्थानिक आणि प्रवाशांना आश्चर्यचकित करणारा ठरला आहे.
या घटनेनंतर सोशल मीडियावर अनेकांनी या अदभुत घटनेवर प्रतिक्रिया दिल्या आहेत. काहींनी म्हटले, “असं काही बघितलं आणि हृदय थांबल्यासारखं वाटलं”, तर काहींनी, “लोको पायलट खूप धाडसी आहे; अन्यथा परिणाम गंभीर होऊ शकले असता” असे लिहिले आहे. तर काहींनी या गरुडाच्या सुरक्षिततेच्या दृष्टीने प्राणी रक्षण उपाययोजनांबाबत चर्चा सुरू केली आहे.
संपूर्ण घटनेत प्रवाशांचा जीव सुरक्षित राहिल्यामुळे ही घटना अजून आश्चर्यचकित करणारी ठरली आहे. रेल्वे प्रशासनाने याबाबत योग्य ती पावले उचलण्याचे आश्वासन दिले आहे आणि भविष्यकाळात अशा प्रकारचे दुर्मीळ अपघात होऊ नयेत यासाठी उपाययोजना करण्याची तयारी सुरू केली आहे.
