आपण जिथे राहतो, जिथे वावरतो तेथील परिसर स्वछ ठेवणे हीसुद्धा आपलीच जबाबदारी आहे. पण, हे लक्षात न घेता, काही जण बेजबाबदारपणे सार्वजनिक ठिकाणी कचरा टाकतात. तसेच काही वाहनचालक, काही प्रवासी पान-तंबाखू खाऊन रेल्वेस्थानकावर थुंकताना दिसतात. आज सोशल मीडियावर याबाबतचा एक व्हिडीओ व्हायरल होत आहे. येथे एक महिला सफाई कर्मचारी रेल्वेस्थानकावरील पान-तंबाखूचे डाग स्वच्छ करताना दिसून आली आहे.
व्हायरल व्हिडीओत तुम्ही पाहू शकता की, एक अज्ञात व्यक्ती रेल्वेस्थानकाचा व्हिडीओ शूट करून घेत असते. तेव्हा एक महिला सफाई कर्मचारी रेल्वेस्थानकावरील पान व गुटखा थुंकल्याने खराब झालेला खांब घासून स्वच्छ करताना दिसत आहे. रेल्वेस्थानकावरील या महिला कर्मचाऱ्याजवळ ही व्यक्ती जाते आणि त्यांना “नमस्कार मॅडम, नागरिक असे पान-तंबाखू खाऊन थुंकतात आणि तुम्हाला साफ करावं लागतं, तेव्हा तुम्हाला कसं वाटतं?”, असा प्रश्न विचारतो. तेव्हा त्या महिला कर्मचाऱ्याकडून काय उत्तर मिळते ते एकदा तुम्हीसुद्धा व्हिडीओतून बघा.
व्हिडीओ नक्की बघा…
व्हिडीओत तुम्ही पाहिले असेल की, महिला सफाई कर्मचारी म्हणते, “सर, माझं हे काम आहे आणि त्यामुळे मला ते करावंच लागतं. नागरिकांना अनेकदा सांगूनदेखील ते सार्वजनिक ठिकाणी, स्थानकावर अशा प्रकारे पान-तंबाखू खाऊन थुंकून ठेवतात. त्यामुळे आम्हाला हे साफ करावं लागतं.” अशा प्रकारे स्वतःचे कर्तव्य बजावताना ती महिला कर्मचारी निराशा व्यक्त करताना दिसून आली आहे.
सार्वजनिक ठिकाणी स्वच्छता राखण्यासाठी अनेक अधिकाऱ्यांकडून प्रयत्न केले जात असले तरीही देशभरातील शहरांमध्ये अशी उदाहरणे दिसणे ही सामान्य बाब झाली आहे. तर सोशल मीडियावर हा व्हिडीओ पाहताच आयएएस अधिकारी अवनीश शरण यांनी या व्हिडीओ @AwanishSharan या एक्स (ट्विटर) अकाउंटवरून शेअर केला आहे आणि जनतेला ‘कृपया हा संदेश योग्य लोकांपर्यंत पोहोचवा’; अशी कॅप्शन देऊन संदेश दिला आहे.
