वसई: साडेतीन मुहूर्तापैकी एक असलेल्या दसऱ्याच्या शुभमुहूर्तावर वाहने खरेदी करण्याकडे नागरिकांचा कल असतो. यावर्षी पालघर जिल्ह्यात दसऱ्याच्या निमित्ताने परिवहन विभागात ३ हजार १०५ वाहनांची नोंद करण्यात आली आहे. यातून ११ कोटी ५९ लाखाचा महसूल परिवहन विभागाच्या तिजोरीत जमा झाला आहे.
सणासुदीच्या काळात नवीन वस्तू व वाहन खरेदी करण्याकडे नागरिकांचा विशेष कल असतो. साडेतीन मुहूर्तांपैकी दसरा हा त्यातील एक महत्वाचा मुहूर्त. या निमित्ताने विविध नवीन वस्तू व वाहने खरेदी करण्यावर नागरिकांचा भर असतो. प्रवासाच्या दृष्टीने सध्या वाहन ही माणसाची गरज बनू लागली आहे. त्यामुळे वाहने खरेदी करण्यासाठी नागरिकांचा उत्साह पहायला मिळत आहे.
वाहन खरेदी करण्यासाठी ग्राहकांनी काही दिवस आधी पासून वाहने विक्रीच्या दुकानात वाहनाबाबत चौकशी, आवडीचा रंग, त्यांच्या किंमती, कर्ज प्रक्रिया करण्यास सुरुवात केली होती. तर काही ग्राहकांनी आधिच आगाऊ रक्कम देऊन वाहने नोंद करून ठेवली होती. यावर्षी दसऱ्याच्या शुभ मुहूर्ताच्या निमित्ताने मागील दहा दिवसात वसईच्या प्रादेशिक परिवहन कार्यालयात ३ हजार १०५ इतक्या नवीन वाहनांची नोंदणी करण्यात आली आहे.
मागील वर्षी ३ हजार ८६१ वाहनांची नोंद झाली होती. त्यामुळे मागील वर्षीच्या तुलनेत वाहननोंदणी कमी झाली असल्याचे परिवहन विभागाने सांगितले आहे. यावर्षी नोंदणी केलेल्या वाहनात दुचाकी २ हजार ३८, चार चाकी (कार) ६५४, ऑटोरिक्षा, ट्रक, व अन्य अशी ४१३ या वाहनांचा समावेश आहे. या वाहनांची नोंदणी करताना शुल्क आकारले जाते या नोंदणी शुल्कातून ११ कोटी ५९ लाख ८७ हजार रुपये इतका महसूल गोळा झाला असल्याची माहिती प्रादेशिक परिवहन विभागाच्या अधिकाऱ्यांनी सांगितले आहे. सद्यस्थितीत वाढत्या महागाईमुळे सर्वच वस्तूंचे भाव वाढत आहेत. वाहनांच्या किंमतीत ही वाढ होत आहे. यावर्षी वाहनांच्या किंमती साधारणपणे १५ टक्क्यांनी वाढल्या असल्याचे विक्रेत्यांनी सांगितले.
दसऱ्यानिमित्ताने नोंद झालेल्या वाहनांची आकडेवारी
- २०२२- १ हजार ८९५
- २०२३- २ हजार १६६
- २०२४- ३ हजार ८६१
- २०२५- ३ हजार १०५
सणासुदीला मोठ्या प्रमाणात वाहनांची खरेदी होत असल्याने परिवहन कार्यालयात नोंदणी होत असते.मागील वर्षीच्या तुलनेत यावर्षी वाहन नोंदणीत कमी झाली असल्याचे दिसून येत आहे. – अतुल आदे, प्रादेशिक परिवहन अधिकारी
