वडझिरे येथील दुर्घटनेत मृत्युमुखी पडलेल्या अवधूत परंडवाल व सुदर्शन आवारी यांच्या कुटुंबीयांना राज्य सरकारच्या वतीने आमदार विजय औटी यांनी आज प्रत्येकी १ लाख रुपयांच्या मदतीचे धनादेश सुपूर्द केले.
गेल्या गुरुवारी वडझिरे येथील पाडळी नदीला आलेल्या पुरात अवधूत परंडवाल, सुदर्शन आवारी यांच्यासह बालू मुरुगन हे तामिळनाडूतील तरुण वाहून गेले. त्या तिघांचाही मृत्यू झाला. राज्य सरकारच्या वतीने परंडवाल व आवारी यांच्या कुटुंबीयांना तातडीने आर्थिक मदत मिळावी यासाठी औटी यांनी पाठपुरावा केला होता. त्यानुसार दोघांच्याही कुटुंबीयांना मंगळवारी मदतीचे प्रत्येकी एक लाख रुपयांचे धनादेश सुपूर्द करण्यात आले. दुर्घटनाग्रस्त तरुणांच्या कुटुंबीयांना मुख्यमंत्र्यांकडून आणखी मदत मिळवून देण्यासाठी आपण प्रयत्नशील असल्याचे औटी यांनी सांगितले. धनादेश प्रदान करताना प्रांताधिकारी राजेंद्र पाटील, तहसीलदार जयसिंग वळवी, उद्योजक रामदास भोसले हे उपस्थित होते.