पालिकेत ९४२ कारकुनांची भरती

मुंबई महापालिकेत तब्बल ९४२ कारकून पदांवर भरती करण्यात येणार असून त्यासाठी ऑनलाइन अर्ज मागविण्यात आले आहेत. या भरतीची माहिती कॉल सेंटर मोबाइलवर उपलब्ध होणार आहे. मात्र त्यासाठी १४ मार्चपर्यंत इच्छुक उमेदवारांना प्रतीक्षा करावी लागणार आहे.
महापालिकेच्या विविध विभागांसाठी ९४२ कारकुनांची भरती करण्याचा निर्णय महापालिकेने घेतला आहे. दहावीला ५० टक्के गुण मिळवून उत्तीर्ण झालेल्या आणि इंग्रजी व मराठी प्रत्येकी ३० शब्द प्रतिमिनीट टायपिंगची क्षमता असलेल्या १८ ते ३३ वयोगटातील व्यक्तींना कारकून पदासाठी अर्ज करता येईल.
त्याचबरोबर संगणक अर्हतेपोटी एमएससीआयटीचे प्रमाणपत्र आवश्यक आहे. या भरती प्रक्रियेबाबत मदत आणि अधिक माहितीसाठी कॉल सेंटर मोबाइल क्रमांक उपलब्ध करण्यात येणार आहे. हा क्रमांक येत्या १४ मार्च रोजी पालिकेच्या वेबसाइटवर उपलब्ध करण्यात येणार आहे, असे पालिका अधिकाऱ्यांनी सांगितले.