सामान्यांना न्याय देणारा काँग्रेस हाच एकमेव पक्ष -माणिकराव

काँग्रेसने सर्वात जास्त जनहिताचे निर्णय घेतले आहेत. शासनाच्या सर्व योजना युकाँच्या माध्यमातून सर्वसामान्यांपर्यंत पोहोचविण्यात येणार आहे. त्या सर्वाचा प्रचार व प्रसार करण्याची जबाबदारी युकाँच्या पदाधिकाऱ्यांनी घ्यावी, असे प्रतिपादन काँग्रेसचे प्रदेशाध्यक्ष आमदार माणिकराव ठाकरे यांनी केले. ते दारव्हा येथील युकाँच्या मेळाव्यात बोलत होते.
व्यासपीठावर शिवाजीराव मोघे, वसंतराव पुरके, आमदार विजयराव खडसे, माजी खासदार हरिभाऊ राठोड, माजी राज्यमंत्री संजय देशमुख, वजाहत मिर्झा, अशोक बोबडे, डॉ. नदीम, पंजाबराव खोडके, अरुण राऊत, सुधाकर दरेकर, तातू देशमुख, राहुल ठाकरे  उपस्थित होते. शासनाच्या विविध योजनांचा लाभ पक्षाच्या माध्यमातून भविष्यात देण्यात येणार आहे. मातेच्या गर्भात असल्यापासून तर जीवनाच्या शेवटपर्यंत अमलात येणाऱ्या सर्व योजना काँग्रेस पक्षाने दिल्या; परंतु त्या योजना काँग्रेस पक्षाने दिल्या, हे सांगत नाही, अशी खंत त्यांनी यावेळी त्यांनी व्यक्त केली.   शिवाजीराव मोघे यांनी सामाजिक कल्याण विभागाच्या योजनांची माहिती दिली. विधानसभा उपाध्यक्ष वसंतराव पुरके यांनी अशक्य असे काहीच नसून फक्त प्रयत्न करीत राहा यश तुमचेच असून युवक काँग्रेसला बळकटी प्राप्त करण्यासाठी मदत करणार असल्याचे मत व्यक्त केले.देश मजबूत करण्यासाठी देशाला काँग्रेस पक्षाची गरज आहे, असे प्रतिपादन माजी राज्यमंत्री संजय देशमुख यांनी केले. प्रास्ताविक युकाँचे लोकसभा अध्यक्ष राहुल ठाकरे यांनी केले.