दारूस पैसे न दिल्याने मित्राचा खून

दारू पिण्यास पैसे दिले नाहीत म्हणून रागापोटी मित्राचा कुऱ्हाडीने वार करून खून करण्याचा प्रकार मंगळवारी पहाटे मिरजेच्या संजयनगर झोडपपट्टीत घडला.
परशुराम रोहिदास कट्टीमनी (वय २१) हा दुर्गामाता विसर्जन मिरवणूक पाहून घरी परतत असताना नवजीवन कॉलनीत दबा धरुन बसलेल्या जितेंद्र ऊर्फ प्रदीप दिलीप तायडे (वय २१) याने डोक्यात व गळ्यावर कुऱ्हाडीने वार केले. त्यात तो जागीच ठार झाला. ही घटना रात्री १ वाजता घडली.
घटना समजताच पोलिसांनी तत्काळ हालचाली करुन आरोपी जितेंद्र तायडे याला हत्यारासह पहाटे ५ वाजता ईदगाह माळ येथे अटक केली. या प्रकरणी शहर पोलीस ठाण्यात खुनाचा गुन्हा दाखल करण्यात आला आहे.