पालिका अधिकारी-कर्मचारी राज्यस्तरीय क्रीडा स्पर्धेस प्रारंभ

 राज्य नगरपालिका अधिकारी-कर्मचारी राज्यस्तरीय क्रीडा स्पर्धेचे शनिवारी शानदार उद्घाटन झाले. राज्यातील ५० नगरपालिकांतील खेळाडूंनी स्पर्धेत सहभाग नोंदविला.
कृषी विद्यापीठाच्या क्रीडासंकुलात जिल्हाधिकारी डॉ. शालिग्राम वानखेडे व आमदार संजय जाधव यांच्या हस्ते क्रीडाज्योत प्रज्वलित करून स्पर्धेचे उद्घाटन झाले. भिवंडी मनपा आयुक्त अर्जुन हंगे, परभणीचे आयुक्त सुधीर शंभरकर, विरोधी पक्षनेते भगवान वाघमारे, स्थायी समितीचे सभापती विजय जामकर, राष्ट्रीय खेळाडू नासेर पठाण आदी उपस्थित होते. कर्मचाऱ्यांना तणावमुक्त ठेवण्यासाठी परभणी महापालिकेने आयोजित केलेल्या या स्पर्धा इतर पालिकांनाही दिशादर्शक ठरतील, असे प्रतिपादन आमदार जाधव यांनी केले. यापुढील स्पर्धाना परभणी महापालिकेच्या वतीने दोन टक्के निधी देण्यात येईल, अशी घोषणा स्थायी समितीचे सभापती विजय जामकर यांनी केली. प्रारंभी नेताजी सुभाषचंद्र सैनिक शाळेच्या विद्यार्थ्यांच्या नेतृत्वात सहभागी खेळाडूंनी मान्यवरांना मानवंदना दिली. प्रास्ताविक स्वागताध्यक्ष दीपक पुजारी यांनी, तर सूत्रसंचालन सुनील तुरूकमाने यांनी केले.