.. भुरूचा ‘अक्कू’ झाला असता..

कुख्यात आरोपी भुरूला ताब्यात घेण्यासाठी जमाव पोहोचला होता, पण पोलिसांनी वेळीच धावपळ केल्याने भुरूचा सोमवारी अक्कू यादव होता होता वाचला. तो हाती न लागल्याने जमाव बिथरला व मग पोलिसांना लाठीमार करावा लागला.
कुख्यात आरोपी भुरू उर्फ शेख अक्रम शेख रहेमान (रा. आनंदनगर) याच्यासह चार आरोपींना आज न्यायालयात सुनावणीसाठी आणण्यात आले होते. भुरूला ताब्यात देण्याची मागणी करीत बाहेर जमाव ठाण मांडून होता. पोलिसांनी जमावाला तेथे थोपवूनही धरले होते. न्यायालयीन कामकाज आटोपल्याने भुरूसह चार आरोपींना तातडीने कारागृहाकडे नेणे आवश्यक होते. त्यांना बाहेर कसे काढावे, या पेचात पोलीस सापडले. तेथे बराच खल झाला. अखेर पोलीस उपायुक्त मंगलजित सिरम न्याय मंदिर परिसरात गेले. दहा-बारा पोलिसांच्या गराडय़ात आरोपींना न्यायालयाच्या पूर्वेकडील बाजूने खाली आणण्यात आले. आरोपींना आणले ते मोठे वाहन शोधण्यात काही मिनिटे गेली. हे वाहन रस्त्याच्या पलीकडे आकाशवाणीच्या भिंतीलगत उभे होते. ते पाहून एका अधिकाऱ्याला संताप आला. ‘एवढय़ा लांब वाहन ठेवावे लागते का’, या शब्दात त्याने फटकारले. एका शिपायाला तेथे पिटाळण्यात आले.
वाहनाची वाट पाहत सुमारे पाच मिनिटे चारही आरोपी पोलिसांच्या गराडय़ात उभे होते. त्यांच्या चेहऱ्यावर प्रचंड भीती होती. पोलिसांचे मोठे वाहन आकाशवाणी चौकाला वळसा घालून न्याय मंदिराच्या पूर्वेकडील फाटकासमोर आले. रस्त्यावर बरीच गर्दी असल्याने यात काही मिनिटे गेली. हे वाहन फाटकासमोर आल्याचे दिसल्यानंतर पोलिसांनी चारही आरोपींना फाटकापर्यंत काही पावले पायी नेले. जमावाच्या भीतीने आरोपींसह पोलिसांनाही वाहनापर्यंत झपझप पावले उचलीत जावे लागले. चारही आरोपी जीवाच्या भीतीने लगेचच वाहनात शिरले. त्यामागे पोलिसांचा ताफा शिरत असल्याने थोडा वेळ लागला. तोपर्यंत दक्षिणेकडील फाटकासमोर असलेल्या जमावाला आरोपींना नेले जात असल्याची कुणकुण लागली. जमाव धावतच जिल्हाधिकारी कार्यालयाच्या दिशेने धावला. पोलीस आरोपींसह वाहनात बसत असतानाच जमाव धावत येत असलेला दिसला. ते दिसताच वाहन चालकाला लगेचच वाहन पुढे दामटण्यासाठी पोलिसांना ओरडावे लागले. तेथे वाहनांची वर्दळ असल्याने चालकाला थोडा त्रास झाला. मात्र, कसेबसे चालकाने वाहन पुढे दामटले. पोलिसांना एक मिनिट उशीर झाला असता किंवा जमाव एक मिनिट आधी पोहोचला असता तर आरोपी जमावाच्या ताब्यात सापडून त्याचा अक्कू झाला असता. आरोपींचे वाहन व्हीसीएच्या दिशेने पुढे निघून गेल्याने पोलिसांनी सुटकेचा श्वास सोडला.