खांद्यावर यशस्वी शस्त्रक्रिया मंगळवारी झाल्यानंतर अभिनेता शाहरूख खान बुधवारी रात्री उशिरा रुग्णालयातून घरी गेल्याची माहिती सूत्रांनी दिली. ‘चेन्नई एक्स्प्रेस’ या रोहित शेट्टी दिग्दर्शित चित्रपटाच्या चित्रीकरणाच्या वेळी हाणामारीचे स्टण्ट्स करताना शाहरूख खानच्या खांद्याला दुखापत झाली होती. मंगळवारी शस्त्रक्रियेच्या वेळी वडिलांसोबत असावे म्हणून लंडन येथे शिक्षण घेत असलेला शाहरुखचा मुलगा आर्यन हाही आला होता. यापुढे चित्रीकरणादरम्यान कोणत्याही स्वरुपाची हाणामारीची दृश्ये स्वत: न करण्याचा सल्ला डॉक्टरांनी शाहरुखला दिला आहे. आता काही दिवस शाहरूखला घरीच विश्रांती घेण्याचा सल्ला डॉक्टरांनी दिला आहे.