जळगावकरांच्या टंचाईवर विशेष पाणी योजनेचा उतारा

महापालिकेने जळगावकरांना पाणीटंचाईची झळ फारशी बसू नये याची पुरेपूर काळजी घेतली असून, आता वाघूर विशेष पाणीपुरवठा योजनेचे काम पूर्ण झाले आहे. या योजनेचे उद्घाटन लवकरच होणार असल्याने भविष्यातही टंचाईचे संकट फारसे भेडसावणार नाही, अशी चिन्हे आहेत.
पालिकेतील सत्ताधारी गटाने शहरातील विकासकामांकडे पूर्णपणे दुर्लक्ष केले असले आणि त्यामुळे जळगावकरांमध्ये प्रचंड नाराजी असली तरी टंचाईच्या दिवसात पिण्याचे पाणी शहराला व्यवस्थित पुरविण्याची त्यांनी दक्षता घेतली आहे. पालिकेने शहरवासीयांना सद्य:स्थितीत जुलैअखेपर्यंत पाणी पुरविण्याचे नियोजन केले आहे. कमी झालेले पावसाचे प्रमाण लक्षात घेऊन शहराची तहान भागविणे, पिण्याचे पाणी पावसाळ्यापर्यंत पुरविणे अशक्य होणार याचा अंदाज सत्ताधाऱ्यांना आला होता. वाघूर धरणातील मृतसाठा मिळविण्याचा प्रयत्न त्यासाठी केला गेला. जिल्ह्याच्या काही गावांत आठ ते दहा दिवसांच्या अंतराने अत्यल्प पाणीपुरवठा होत असताना जळगावमध्ये मात्र आजही दोन दिवसाआड पुरेसे पाणी मिळत आहे. विशेष योजना कार्यान्वित झाल्यावर जुलैअखेपर्यंत असाच पुरवठा होत राहील, असा विश्वास महापौर किशोर पाटील यांनी व्यक्त केला आहे.
शहरासाठी वाघूर धरणातून पाणीपुरवठा होत असल्याने नोव्हेंबर २०१२ पर्यंत एक दिवसाआड, तर १५ नोव्हेंबरपासून दोन दिवसाआड पाणीपुरवठा करण्याचा निर्णय घेतला गेला.
सध्या वाघूर धरणातून ६० दशलक्ष घनमीटर पाणी घेतले जात आहे. शिल्लक पाणी पावसाळ्यापर्यंत पुरविण्यासाठी १ एप्रिलपासून तीन दिवसाआड पाणीपुरवठा करण्याचा निर्णय प्रभारी आयुक्त तथा जिल्हाधिकारी ज्ञानेश्वर राजूरकर यांनी घेतला होता. तथापि, सत्ताधारी गटाने त्याला प्रखर विरोध केला. धरणातील पाण्याचे नियोजन योग्यरीतीने केल्यास आहे त्याच स्थितीत पाणीपुरवठा करता येणे शक्य असल्याचे व त्यासाठी धरणातील मृतसाठा वापरण्याबद्दल जिल्हाधिकाऱ्यांना पटवून देण्यात आले. त्यानंतर महापौर किशोर पाटील यांनी वाघूर धरणातील मृतसाठा वापरण्याची परवानगी मिळविण्याचे प्रयत्न केले. त्यासाठी विशेष योजना तयार करून प्रस्ताव व खर्चाचा प्रस्ताव शासनाकडे सादर केला. जल प्राधिकरणाच्या माध्यमातून तयार करण्यात आलेल्या व सुमारे सव्वा दोन कोटी रुपये खर्चाच्या या योजनेस शासनाकडून मान्यता मिळाली. युद्धपातळीवर कामही सुरू करण्यात आले.
शासनाकडून एक कोटी ३४ लाखांचा निधी यासाठी मिळावा म्हणून पालकमंत्री गुलाबराव देवकर यांनीही प्रयत्न केले. दोन महिन्यांचे अथक परिश्रम व प्रयत्नांनंतर विशेष योजनेचे काम पूर्णत्वास गेले असून, योजनेची चाचणी घेण्यात आल्यावर योजनेचे उद्घाटन केले जाणार आहे. ही योजना कार्यान्वित झाल्यास पाच लाख लोकसंख्येच्या शहराची तहान तर भागेलच, पण विशेष की, योग्य नियोजनामुळे ऑगस्टपर्यंत हे पाणी पुरणार असल्याचे महापौर पाटील यांनी म्हटले आहे.