कामचुकार वाहतूक पोलिसांवर कारवाई आवश्यक

शहरातील बेशिस्त रिक्षाचालकांना शिस्त लावण्याचा प्रयत्न केल्यास वाहतूक पोलिसांवरच रिक्षाचालकांकडून हल्ले करण्यात येत असल्याचे अनेक प्रकार अलीकडे घडले आहेत. या प्रकारांमुळे वाहतूक पोलिसांत एकप्रकारची दहशत निर्माण झाली की काय असे वाटण्याइतपत परिस्थिती शहरातील अनेक चौकात वाहतूक पोलिसांची कामगिरी बघितल्यास लक्षात येऊ शकेल. नियमांचे पालन न करणाऱ्यांविरोधात वाहतूक पोलिसांकडून कोणतीच कारवाई होत नसल्याचे दिसून येत आहे.
बेशिस्त रिक्षाचालक आणि वाहतूक पोलीस यांच्यातील संबंध हा विषय तसा जुनाच. रिक्षाचालकांशी असलेले घनिष्ठ संबंध पोलिसांना त्यांच्याविरूध्द कारवाई करण्यास आडकाठी ठरत असल्याचे अनेकांचे मत आहे. अनेक चौकांमध्ये तर दुपारच्या वेळी वाहतूक पोलीस रिक्षांमध्ये बसलेलेही आढळतात. त्यामुळे रिक्षाचालकांवर वाहतूक पोलिसांचा धाक उरत नाही. प्रसंगी हेच रिक्षाचालक पोलिसांवर हात टाकावयास मागेपुढे पाहात नाहीत. शालिमार आणि निमाणी चौकात अलीकडेच वाहतूक पोलिसांना मारहाणीचे जे प्रकार घडले. त्यामुळे सर्वसामान्यच आश्चर्यचकित झाले. ज्यांनी बेशिस्त रिक्षाचालकास आपला खास पोलिसी हिसका दाखवून वठणीवर आणावयास पाहिजे त्याच पोलिसांवर रिक्षाचालक हात उगारतो म्हणजे काय ? रिक्षाचालकांच्या या कृतीविरोधात वाहतूक पोलिसांविषयी खरे तर सर्वसामान्यांना सहानुभूती वाटावयास हवी. परंतु वाहतूक पोलिसांविषयी फारशी सहानुभूती न वाटण्याची अनेक कारणे आहेत.
ऊन-पावसाची पर्वा न करता प्रामाणिकपणे चौकात उभे राहून कर्तव्य पाडणारे काही वाहतूक पोलीस निश्चितच गौरवास पात्र आहेत. परंतु बेशिस्त रिक्षाचालकांप्रमाणेच काही बेशिस्त वाहतूक पोलीसही चौका-चौकात दिसतात. महात्मा गांधी रस्त्यावरील रेडक्रॉस सिग्नलवर वाहतूक पोलीस नेमका कुठे उभा असतो तेच कळत नाही. कधी रसवंतीत तर कधी रसवंतीच्या कोपऱ्यावर झाडांच्या सावलीत हे महाशय उभे असतात. त्यांच्या समक्ष अनेक वाहतूकदार बेधडकपणे नियमांचा भंग करत असतात. परंतु अशा वाहनधारकांना अडविणे हे आपले कामच नव्हे अशा आविर्भावात ते असतात. सार्वजनिक वाचनालयाकडून येणाऱ्या वाहनांसाठी सरळ रविवार कारंजाकडे जाता येत नाही. असे असतानाही काही रिक्षा किंवा दुचाकी थेट रविवार कारंजाकडे बेधडक वाहन हाकतात. वाहतूक पोलीस असतानाही ही गत असेल तर इतरवेळी या ठिकाणी वाहतुकीची काय अवस्था होत असेल ते कोणाच्याही लक्षात येईल. रेडक्रॉस सिग्नलप्रमाणेच पंचवटीतील काटय़ा मारूती चौफुलीवर परिस्थिती आढळून येईल. या ठिकाणी वाहतुकीचा एकच गोंधळ उडत असतानाही तो दूर करण्यासाठी वाहतूक पोलीस दिसतच नाहीत. काटय़ा मारूती पोलीस चौकीच्या बाजूला वाहतूक पोलीस उभे असलेले दिसतात. ते नेमके तिथे उभे राहून काय करतात, हे वाहनधारकांना समजत नाही. रिक्षा चालकांच्या बेशिस्तीसाठी प्रसिध्द असलेली शालिमार आणि रविवार कारंजा ही दोन ठिकाणे. एखाद्या वाहतूक पोलिसाला मारहाणीचा प्रकार घडल्यावर या ठिकाणी काही दिवस वाहतूक पोलिसांची फौजच्या फौज तैनात असते. पुन्हा स्थिती जैसे थे होते.
रविवार कारंजावर तर दुचाकीवरून गुंडासारखे दिसणारे तरूण येत असताना दिसताच वाहतूक पोलीस सोयीस्करपणे ते निघून जाईपर्यंत त्यांच्याकडे पाठ करून उभे राहतात. याउलट ग्रामीण भागातील किंवा एखादा महाविद्यालयीन विद्यार्थी दुचाकीवरून येताना दिसल्यास त्याची हमखास तपासणी केली जाते. या ठिकाणी कोपऱ्यावर उभ्या राहणाऱ्या रिक्षाचालकांना हटविण्यास अजूनही पोलिसांना यश आलेले नाही. हे असे सर्व प्रकार नियमांचे पालन करणाऱ्या वाहनधारकांसमोर घडत असल्याने वाहतूक पोलिसांविषयी सहानुभूती वाटण्याचे प्रमाण कमी होते. काही दिवसांपूर्वी पोलीस आयुक्तांनी शहरात फेरफटका मारला असता नेमून दिलेल्या ठिकाणी उपस्थित नसणाऱ्या कर्मचाऱ्यांविरोधात त्यांनी कारवाईचे अस्त्र उगारले. आयुक्तांनी असा फेरफटका कायम मारल्यास त्यांच्या नजरेस अनेक गोष्टी येतील. किमान आयुक्तांच्या धाकाने तरी वाहतूक पोलीस कार्यतत्पर होतील. परिणामी वाहतुकीला शिस्त लागू शकेल, अशी नाशिककरांना अपेक्षा आहे.