विदर्भात शीतलहर कायम; ६ जिल्ह्य़ात पारा घसरला

विदर्भात शीतलहर कायम असून बुधवारी सहा जिल्ह्य़ांचा पारा घसरला आहे. नागपूरसह सहा जिल्ह्य़ांचे तापमान १० अंश सेल्सिअसपेक्षा कमी नोंदविले गेले. विदर्भात आठवडाभरापासून थंडीचा कडाका सुरू झाला आहे. तापमानदर्शक यंत्रातील पारा दिवसेंदिवस खाली जात आहे.  सर्वाधिक कमी तापमानाची नोंद उपराजधानीत (६.३ अंश से.) झाली. वर्धा ७, गोंदिया ७.६, यवतमाळ ८.४, अकोला ९ व अमरावती ९.२ अंश से. किमान तापमानाची नोंद झाली आहे. विदर्भातील सर्वच जिल्ह्य़ांचे कमाल तापमान २९ अंशाखालीच नोंदविण्यात आले. गोंदियात तर कमाल २५.१ अंश से. अशी नोंद  झाली. चंद्रपूर व ब्रह्मपुरीत पारा अनुक्रमे १२ व १०.८ अंश सेल्सिअसवर आहे.  थंडीचा कडाका अजून काही दिवस कायम राहील. पुढील दोन दिवसात कमाल तापमान २८ आणि किमान ७ अंश से. राहील, असा अंदाज हवामान खात्याच्या नागपूर कार्यालयाने वर्तविला आहे. शहरासह गावांमध्येही चौकाचौकात शेकोटय़ा पेटल्या आहेत. उबदार कपडे घालून थंडीपासून बचाव करण्याचा प्रयत्न नागरिक करीत आहेत.