भारती एअरटेलकडून ग्राहकसंख्येत २० कोटींचा टप्पा

दूरसंचार क्षेत्र खासगीकरणासाठी खुले झाल्यानंतर सर्वप्रथमच शिरकाव करणारी आणि मोबाइल ग्राहकसंख्येत देशातील सर्वात मोठी कंपनी बनलेल्या भारती एअरटेलने २० कोटींचा पल्ला गाठला आहे. व्यवसायाची दोन दशके पूर्ण करणाऱ्या भारती एअरटेलने ही अनोखी कामगिरी बजावतानाच जगातील चौथी मोठी दूरसंचार कंपनी म्हणूनही मान मिळविला आहे.
देशात ९० च्या दशकात दूरसंचार क्षेत्र खासगी कंपन्यांसाठी मोकळे झाल्यानंतर भारती एअरटेलला नोव्हेंबर १९९४ मध्ये मोबाइलसाठी पहिल्यांदा परवाना मिळाला. यानंतर पुढील वर्षांतच कंपनीने दूरसंचार सेवा सुरू केली. जगातील दुसरा मोठा मोबाइलग्राहक देश असलेल्या भारतात कंपनीने आता २०.०८ कोटी मोबाइलधारक जोडत हा टप्पा पार करणारी पहिली कंपनी ठरली आहे.
भारती एअरटेल ही देशातील सर्वात मोठी मोबाइलधारक असणारी कंपनी आहेच. जानेवारीअखेरच्या २० कोटींपैकी निम्मे ग्राहक हे अवघ्या गेल्या पाच वर्षांतच मिळविले आहेत. १० कोटी ग्राहकसंख्येचा स्तर कंपनीने २००९ मध्येच ओलांडला होता. कंपनीचा बाजारहिस्सा सर्वाधिक, २८.१ टक्के आहे. लूप मोबाइलवर ताबा मिळवतही कंपनी ७० लाख धारकांसह मुंबईतील पहिली कंपनी झाली आहे.