Kojagiri Purnima 2025: ६ ऑक्टोबरला साजरी केली जाईल कोजागिरी पौर्णिमा, जाणून घ्या… कोजागिरीच्या रात्री चंद्रासह देवी लक्ष्मी पूजा करण्याचे विशेष महत्व

यंदा कोजागिरी पौर्णिमा कधी?

कोजागिरी पौर्णिमा तिथी प्रारंभ: ६ ऑक्टोबर रोजी सकाळी ११ वाजून २४ मिनिटांनी सुरू होणार असून

कोजागिरी पौर्णिमा तिथी समाप्ती: ७ ऑक्टोबर रोजी सकाळी ९ वाजून ३५ मिनिटांपर्यंत असेल.

६ ऑक्टोबर रोजी दिवसभर पौर्णिमा तिथी असल्याने या दिवशी कोजागिरी साजरी केली जाईल तसेच ६ ऑक्टोबरच्या रात्री देवी लक्ष्मी आणि चंद्राची पूजा-देखील केली जाईल.

कोजागिरी पूजेचा शुभ मुहूर्त

कोजागिरीच्या रात्री ११ वाजून ४५ मिनिटांपासून ते १२ वाजून ३४ मिनिटांपर्यंत लक्ष्मीचे पूजन करण्याचा शुभ मुहूर्त आहे. या शुभ मुहूर्तावर देवी नारयण आणि लक्ष्मीच्या फोटोसमोर तूपाचा दिवा लावून श्रीसुक्ताचे पठण करावे. त्यानंतर चंद्राच्या प्रकाशात ठेवलेल्या दूधाचा नैवेद्य दाखवून त्या दूधाचे सेवन करावे.

कोजागिरी पौर्णिमेला चंद्रासह लक्ष्मीची पूजा का करावी?

कोजागिरी पौर्णिमेच्या रात्री जागरण करून लक्ष्मी देवीचे पूजन करण्याच्या प्रथेमुळे याला कोजागरी पौर्णिमा असेही संबोधले जाते. काही ठिकाणी याला नवान्न पौर्णिमा असेही म्हणतात. कोजागरीला लक्ष्मी चंद्रमंडलातून भूतलावर उतरून ‘को जागर्ती’? असा प्रश्न विचारते, असे मानले जाते. त्यामुळे या पौर्णिमेला कोजागरी असे म्हणतात. भारतातील बहुतांश ठिकाणी शरद पौर्णिमेला लक्ष्मी नारायणाचे पूजन करण्याची प्रथा प्रचलित आहे. या दिवशी देवी नारायणांसह गरुडावर आरुढ होऊन पृथ्वीतलावर येते. लक्ष्मी देवीचे दर्शन घेण्यासाठी अनेक देवता स्वर्गातून पृथ्वी येतात. तसेच या दिवशी रात्री मसाला दूध पिण्याची प्रथा प्रचलित आहे.

(टीप: वरील लेख प्राप्त माहितीवर आधारित आहे.)