दुकाने फोडणारी महिलांची एक टोळी शहरात सक्रिय झाल्याने पोलीस चक्रावून गेले आहेत. वेदांतनगर भागातील पाच दुकानांचे शटर उचकटून माल लंपास करणाऱ्या या टोळीत केवळ महिला आहेत. क्रांती चौक भागातील एका दुकानातील सीसीटीव्ही फुटेजमध्ये या महिला चोर दिसून आल्या आहेत. शहरातील बन्सीलालनगरमध्ये एका फुड मॉलमध्ये शटर उचकटून दोन ३५ ते ४० वयोगटातील दोन महिला आणि चार युवती घुसल्या. त्यांनी ६ हजार २०० रुपये लंपास केले. गेल्या काही दिवसांत घडणाऱ्या चोरीच्या घटनांमध्ये या महिला टोळीचा संबंध असेल काय, याचा तपास पोलीस करीत आहेत. शहरातील बन्सीलालनगरात फुड मॉलमधील चोरीच्या तपासात पोलिसांनी सीसीटीव्ही फुटेज तपासले असता सहा महिलांची टोळी शटर उचकटून चोरी करत असल्याचे आढळून आले. या महिला शटर कशापद्धतीने उचकटतात हे तपासून ही टोळी औरंगाबाद शहरातीलच आहे की नाही या अंगाने तपास केला जात असल्याचे पोलीस निरीक्षक हेमंत कदम यांनी सांगितले. शहरात पहिल्यांदाच महिला चोरांची टोळी सक्रिय झाली आहे. गेल्या काही दिवसांत ७० हजार रुपयांचा माल या टोळीने पळवला होता.
