काव्यमैफल : माझा मायदेश

माझ्या मायदेशात
भिन्न धर्म पंथ
एकतेची महती गाई
येथे कबीर संत
 
माझ्या मायदेशाचा
बावळा जरी वेश
संस्काराची शिदोरी
देई माझा देश

सैनिक
डॉ. प्रकाश गोसावी
देश माझा, मी देशाचा
सैनिक माझे नाव,
परचक्राचा येता घाला
सत्वर घेईन धाव

निधडी छाती, फौलादी बाहू
धमन्यांतूनी वाहे लाव्हा,
नजरेत आग-तेजाब
रणमर्द शूर मी छावा

भीती न मजला मुळी मरणाची
स्फुल्लिंग मी शौर्याचे,
पुढेच जाणे मजला ठावे
ब्रीद असे सैनिकाचे

खडा पहारा सीमेवरती
शत्रूचे करीन शीरकाण
तसू न देईन, स्वप्राणाचे
देईन तरी बलिदान

देश असे हा देव माझा
देशसेवा माझी पूजा
देशभक्तीचे कंकण हाती
धर्म न माझा दुजा

डौलात फडकतो तिरंगा
भारतभूमीची शान,
जनन-मरण तूजसाठी
तूजवरी कोटी जन्म कुर्बान!