BMC Election 2017: नेत्यांच्या नातेवाईकांना ‘काही खुशी काही गम’

सत्ता आणि सगेसोयरे हे तसे समानार्थी शब्द. सगेसोयऱ्यांच्या मदतीने सत्ता राखता येते आणि सत्तेच्या मदतीने सोयरीकही जुळवता येते. त्यामुळे राजकारणामध्ये अनेकदा नेते आपल्या नातेवाईकांसोबत रिंगणात उतरतात. यंदाच्या मुंबई महापालिकांच्या निवडणुकांमध्येही तेच झालं. पण यंदा हे नेते आणि त्यांच्या नातेवाईकांसाठी ही निवडणूक ‘काही खुशी काही गम’ अशी ठरली.

अश्रफ आणि त्यांची पत्नी दिलशाद आझमी हे गेल्या दोन निवडणुकांमध्ये विजयी ठरणारं जोडपं राहिलं आहे. गेल्या निवडणुकीच्या वेळी त्यांनी समाजवादी पक्षाच्या तिकिटावर निवडणूक लढवली होती. यंदा काँग्रेसच्या तिकिटावर निवडणुकीच्या रिंगणात उतरलेल्या या जोडप्याने विजय आपल्याकडे खेचून आणला.