सामान्य माणसाच्या दैनंदिन आयुष्यातील वस्तू स्वस्त तर सिगारेट महाग होणार; GST ची नवी कर रचना कशी असेल?

Center Proposes new GST rates: पंतप्रधान नरेंद्र मोदी यांनी दिवाळीपर्यंत जीएसटी कर रचनेच्या प्रणालीमध्ये मोठे बदल होणार असल्याचे सुतोवाच केले होते.

केंद्र सरकार जीएसटीमध्ये मोठे बदल करण्याच्या तयारीत असल्याची बाब समोर आली आहे. (फोटो- इंडियन एक्सप्रेस)

Center Proposes new GST rates: पंतप्रधान नरेंद्र मोदी यांनी आज स्वातंत्र्यदिनानिमित्त लाल किल्ल्यावरून भाषण करत असताना जीएसटी कररचनेत मोठे सुधार करण्याची घोषणा केली होती. आता देशभरातील कर कमी करण्याची वेळ आली आहे. ही आता काळाची मागणी आहे, पुढच्या पिढीसाठी जीएसटीची पुनर्रचना केली जावी, असे ते म्हणाले होते. यानंतर पीटीआयने सरकारी सूत्रांच्या हवाल्याने जीएसटी कररचनेत मोठे बदल होणार असल्याचे वृत्त दिले आहे. या बदलांमुळे सामान्यांना दिलासा मिळणार असून तंबाखू आणि इतर काही वस्तूंवरील जीएसटी वाढणार असल्याची माहिती मिळत आहे.

केंद्र सरकारने सुधारित वस्तू आणि सेवा कर (GST) प्रणालीअंतर्गत ५ टक्के आणि १८ टक्के असे दोन दर प्रस्तावित केले आहेत, असे पीटीआयने शुक्रवारी सरकारी सूत्रांच्या हवाल्याने वृत्त दिले. सूत्रांनी दिलेल्या माहितीनुसार, सध्याच्या २८ टक्के कर श्रेणीतील ९० टक्के करपात्र वस्तू सुधारित कर प्रणालीमध्ये १८ टक्क्यांच्या श्रेणीत येण्याची शक्यता आहे. इंडिया टुडेने दिलेल्या वृत्तानुसार, हा प्रस्ताव जीएसटी परिषदेकडे पाठविण्यात आला आहे. सप्टेंबर महिन्यात या बदलांना अंतिम स्वरुप देण्यासाठी दोन दिवसांची बैठक होण्याची शक्यता वर्तविण्यात आली आहे.

हिंदुस्तान टाइम्स संकेतस्थळाने पीटीआयच्या हवाल्याने दिलेल्या वृत्तानुसार, सुधारित जीएसटी प्रणालीमध्ये सामान्य माणसाच्या दैनंदिन वापराच्या उत्पादनांवर ५ टक्के कर आकारला जाण्याची शक्यता आहे. तर चैनींच्या वस्तूंवर, तसेच तंबाखू आणि पान मसाला यासारख्या हानिकारक पदार्थांवर ४० टक्के कर लावला जाण्याची शक्यता वर्तविण्यात येत आहे.

हेही वाचा

PM Modi : पंतप्रधान नरेंद्र मोदींची घोषणा; “महागाई कमी होणार, जीएसटीमध्ये कपात, दिवाळीच्या आधी भारतीयांना मोठं गिफ्ट”

पंतप्रधान नरेंद्र मोदी यांनी आज लाल किल्ल्यावरून केलेल्या स्वातंत्र्यदिनाच्या भाषणात केंद्र सरकार जीएसटी कर रचनेत सुधार करणार असल्याचे सुतोवाच केले होते. या सुधारणेमुळे सामान्य ग्राहक आणि छोटे व्यापारी यांना फायदा होणार असल्याचे ते म्हणाले होते. दिवाळीच्या दरम्यान ही नवी कर रचना अमलात येणार असून यामुळे सामान्यांना दिवाळीचे ‘डबल गिफ्ट’ मिळणार आहे, असे ते म्हणाले होते.

२०१७ पासून देशात वस्तू व सेवा कर प्रणाली सुरू झाली. देशात सध्या सोने आणि चांदी व इंधन वगळता बहुतेक वस्तू आणि सेवांवर ०, ५, १२, १८ आणि २८ टक्के अशा कर श्रेणीनुसार जीएसटी आकारला जातो. सिगारेट आणि महागड्या गाड्यांवर अतिरिक्त कर लावला जातो. प्रस्तावित सुधारणांचा उद्देश १२ टक्क्यांची श्रेणी काढून टाकणे आणि त्या वस्तूंचे ५ आणि १८ टक्क्यांच्या श्रेणींमध्ये पुनर्वितरण करणे आहे.

New GST Rates: सामान्य माणसाच्या दैनंदिन आयुष्यातील वस्तू स्वस्त तर सिगारेट महाग होणार; GST ची नवी कर रचना कशी असेल?