मुंबई: ‘जीएनजी इलेक्ट्रॉनिक्स’ने बुधवारी भांडवली बाजारात स्वप्नवत पदार्पण केले आणि समभाग २३७ रुपये या वितरण किमतीच्या तुलनेत ४९.७८ टक्क्यांच्या प्रचंड अधिमूल्यासह सूचिबद्ध झाला. राष्ट्रीय शेअर बाजारात ३५५ रुपयांच्या किमतीवर समभागाने व्यवहार सुरू केले.
‘जीएनजी’चा समभाग ३५५ रुपयांवरून सुरुवात करीत सत्रातील व्यवहारात ३५९.४० रुपयांच्या उच्चांकी पातळीवर झेपावला. तर ३२५.५५ रुपये हा त्याचा दिवसातील तळ राहिला. याचाच अर्थ चार दिवसांपूर्वी संपलेल्या ‘आयपीओ’साठी अर्ज दाखल करून, ‘जीएनजी’चा समभाग मिळविण्यास यशस्वी ठरलेल्या गुंतवणूकदारांना दिवसअखेर समभाग ४०.६७ टक्क्य़ांच्या म्हणजेच प्रति समभाग ९६.३९ रुपयांचा फायदा झाला. पहिल्या दिवसअखेर समभाग ३३३.३९ रुपयांच्या भाव पातळीवर स्थिरावला. ज्यामुळे कंपनीचे बाजार भांडवल ३,८०१ कोटी रुपयांवर पोहोचले आहे.
जीएनजी इलेक्ट्रॉनिक्सच्या प्रारंभिक समभाग विक्रीला गुंतवणूकदारांकडून तुफान प्रतिसाद मिळाला होता. २३ जुलै ते २५ जुलै असे तीन दिवस सुरू राहिलेल्या ‘आयपीओ’मध्ये गुंतवणूकदारांकडून १४६.९० पटीने अधिक समभागांसाठी मागणी नोंदविणारा भरणा झाला होता. राष्ट्रीय शेअर बाजाराच्या आकडेवारीनुसार, कंपनीने आयपीओच्या माध्यमातून १.४१ कोटी समभाग विक्रीसाठी उपलब्ध केले होते. मात्र त्यातुलनेत गुंतवणूकदारांकडून सुमारे २०८ कोटी समभागांची मागणी नोंदवण्यात आली होती. जीएनजी इलेक्ट्रॉनिक्सने आयपीओसाठी प्रति समभाग २२५ ते २३७ रुपये किंमत पट्टा निश्चित केला होता.
जीएनजी इलेक्ट्रॉनिक्सच्या आयपीओमधून उभा राहणारा निधी मुख्यतः कर्जाचा बोजा कमी करण्यासाठी वापरला जाणार आहे. त्यापैकी ३२० कोटी रुपये कंपनी आणि तिची प्रमुख उपकंपनी, ‘इलेक्ट्रॉनिक्स बाजार एफझेडसी’ने घेतलेल्या काही थकित कर्जांची परतफेड आणि अग्रिम देणी फेडण्यासाठी वापरले जातील. उर्वरित निधी सामान्य कॉर्पोरेट उद्देशांसाठी राखीव ठेवण्यात आला आहे.
जीएनजी इलेक्ट्रॉनिक्स लॅपटॉप आणि डेस्कटॉपच्या रिफर्बिशमेंट अर्थात नूतनीकरणात गुंतलेली आहे. कंपनीचे कामकाज भारत, अमेरिका, युरोप, आफ्रिका आणि संयुक्त अरब अमिरातीमध्ये चालते. कंपनी ‘इलेक्ट्रॉनिक्स बाजार’ या ब्रँड अंतर्गत काम करते, सोर्सिंगपासून रिफर्बिशमेंट ते विक्री, विक्रीनंतरच्या सेवा आणि वॉरंटी प्रदान करून संपूर्ण रिफर्बिशमेंट मूल्य साखळीत तिची लक्षणीय उपस्थिती आहे.
