मुंबई: देशाच्या परकीय गंगाजळीतील सोन्याचे प्रमाण गेल्या चार वर्षांत दुपटीने वाढले आहे. मार्चअखेरीस डॉलर मूल्यामध्ये परकीय गंगाजळीतील सोन्याचे प्रमाण ११.७० टक्क्यांवर पोहोचल्याचे रिझर्व्ह बँकेच्या ताज्या अहवालाने सोमवारी स्पष्ट केले.
रिझर्व्ह बँकेच्या परकीय गंगाजळी अहवालानुसार, डॉलर मूल्यामध्ये परकीय गंगाजळीत सोन्याचे प्रमाण मार्चअखेरीस ११.७० टक्के आहे. त्याआधी सप्टेंबर २०२४ अखेरीस हे प्रमाण ९.३२ टक्के आणि मार्च २०२१ अखेरीस हे प्रमाण ५.८७ टक्के होते. रिझर्व्ह बँकेकडे मार्चअखेरीस ८७९.५९ टन सोने आहे. त्याआधी सप्टेंबर २०२४ अखेरीस बँकेकडे ८५४.७३ टन सोने होते. मार्चअखेरीस असलेल्या एकूण सोन्यापैकी ५११.९९ टन देशात आहे. तर उरलेले ३४८.६२ टन सोने बँक ऑफ इंग्लंड आणि बँक फॉर इंटरनॅशनल सेटलमेंट्सच्या सुरक्षित कोठडीत आहे. तसेच, बँकेकडे सुवर्ण ठेवींच्या रुपात १८.९८ टन सोने आहे.
रिझर्व्ह बँकेकडील गंगाजळीशी देशावरील अल्पकालीन कर्जाचे गुणोत्तर सप्टेंबर २०२४ अखेरीस १९.१ टक्के होते. ते गेल्या वर्षी डिसेंबर अखेरीस २२ टक्क्यांवर पोहोचले. याचबरोबर गंगाजळीशी अस्थिर भांडवली ओघाचे गुणोत्तर सरलेल्या डिसेंबरअखेरीस ७४.३ टक्के होते. त्याआधी सप्टेंबर २०२४ अखेरीस ते ६७.८ टक्के होते, असेही अहवालात स्पष्ट करण्यात आले आहे.
वित्तीय स्थिरतेसाठी आवश्यक
प्रत्येक देशातील मध्यवर्ती बँका सोन्याच्या साठा ठेवून मालमत्ता प्रकारांमध्ये वैविध्य आणतात. सोन्याचा वापर वित्तीय स्थिरतेची हमी आणि जोखीम व्यवस्थापनासाठी करता येतो. महागाई आणि चलनातील अस्थिरता यात सोने हे महत्वाची भूमिका बजावते. जागतिक वित्तीय बाजारपेठा आणि चलनांमध्ये अस्थिरता निर्माण झाल्याने काही काळापूर्वी मध्यवर्ती बँकांनी सोन्याची खरेदी वाढविली होती.
