Aviation Turbine Fuel: विमान इंधन आणि वाणिज्य वापराचे सिलिंडर महाग

ताज्या वाढीनंतर विमानाच्या इंधनाचे दर मुंबईमध्ये हे दर किलोलिटरला ८१,८६६.१३ रुपयांवरून ८४,६४२.९१ रुपयांपर्यंत, तर दिल्लीत आता हे दर किलोलिटरला ९०,५३८.७२ रुपये झाले असल्याचे सरकारी तेल कंपन्यांनी स्पष्ट केले. गेल्या महिन्यात दोनदा किंमत कमी झाल्याने विमान कंपन्यांचा भार हलका होण्यास मदत झाली होती. आता मात्र पुन्हा त्यात ३ टक्क्यांहून अधिक वाढ झाली आहे. विमान कंपन्यांचा परिचालन खर्चाच्या जवळपास ४० टक्के खर्च इंधनावर होतो.

हेही वाचा :Bandhan Bank: बंधन बँकेची सूत्रे पार्था प्रतिम सेनगुप्ता यांच्याकडे

सोबतच, तेल कंपन्यांनी वाणिज्य एलपीजीच्या किमतीत ६२ रुपयांनी वाढ केल्याने १९ किलोग्रॅमच्या सिलिंडरची किंमत १,८०२ रुपये (दिल्ली) झाली आहे. ही सलग चौथी मासिक वाढ आहे. मुंबईत वाणिज्य एलपीजीची किंमत आता प्रति सिलिंडर १,७५४.५० रुपये आहे. गेल्या महिन्यात ४८.५ रुपयांची वाढ करण्यात आली होती. दुसरीकडे मात्र घरगुती वापराच्या स्वयंपाकाच्या गॅसचा दर ८०३ रुपये प्रति सिलिंडरवर कायम आहे.