शाहरूख, अमिताभसह बॉलीवूड ताऱ्यांचा पैसा असलेल्या या कंपनीच्या ‘आयपीओ’मध्ये तुम्ही गुंतवणूक कराल?

मुंबई : श्री लोटस डेव्हलपर्स अँड रिअ‍ॅल्टी या बहुप्रतिक्षित लक्झरी रिअल इस्टेट आयपीओमध्ये बॉलीवूडचे दिग्गज शाहरुख खान, अमिताभ बच्चन आणि प्रसिद्ध गुंतवणूकदार आशिष कचोलिया यांच्यासह इतरही गुंतवणूकदारांच्या मोठ्या समूहाने आयपीओपूर्व गुंतवणूक केली आहे.

येत्या ३० जुलै रोजी कंपनीची प्रारंभिक समभाग विक्री (आयपीओ) खुली होणार असून गुंतवणूकदारांना येत्या १ ऑगस्टपर्यंत त्यात गुंतवणूक करता येईल. कंपनीने आयपीओसाठी प्रति शेअर १४०-१५० रुपये किमंतपट्टा निश्चित केला आहे. कंपनी आयपीओच्या माध्यमातून ७९२ कोटी रुपयांची निधी उभारणी करणार आहे. कंपनीने नोव्हेंबर २०२४ मध्ये खासगी प्लेसमेंटच्या आधारे ४०० कोटी रुपयांची निधी उभारणी केली होती. त्यावेळी ११८ गुंतवणूकदारांना सुमारे १५० रुपये प्रतिसमभागाप्रमाणे समभाग वितरित करण्यात आले होते.

याचाच अर्थ, शाहरुख खान आणि अमिताभ बच्चन यांनी केलेल्या गुंतवणुकीत अद्याप कोणतीही वाढ झालेली नाही. ज्यांना प्रत्येकी १० कोटी रुपयांचे ६.६७ लाख समभाग  मिळाले होते. हृतिक रोशन आणि राकेश रोशन (प्रत्येकी १ कोटी रुपये), टायगर श्रॉफ (५० लाख रुपये), जितेंद्र (रवी कपूर), तुषार कपूर, साजिद नाडियाडवाला आणि मनोज वाजपेयी यासारख्या चित्रपट क्षेत्रातील तारकांनी देखील यात गुंतवणूक केली आहे. ज्यांनी प्रत्येकी १० लाख रुपयांपासून ते १ कोटी रुपयांपर्यंत गुंतवणूक केली आहे.

शेअर बाजारातील आघाडीचे गुंतवणूकदार आशिष कचोलिया यांनीही ५० कोटी रुपयांची गुंतवणूक केली आहे, तर जगदीश मास्टर आणि डीआर चोक्सी फिनसर्व्ह सारख्या इतरांनी प्रत्येकी १० कोटी रुपयांची गुंतवणूक केली आहे.  

बॉलीवूडची गुंतवणूक कशी?

आनंद पंडित हे श्री लोटस डेव्हलपर्स अँड रिअ‍ॅल्टी लिमिटेडचे अध्यक्ष आणि व्यवस्थापकीय संचालक आहेत. ते कंपनीच्या प्रवर्तकांपैकी एक आहेत आणि त्यांना रिअल इस्टेट क्षेत्रात २४ वर्षांहून अधिक अनुभव आहे. मात्र याबरोबरच ते चित्रपट निर्माता, चित्रपट वितरक आहेत. ते मराठी, हिंदी आणि गुजराथी भांषांमधील काही चित्रपटांचे निर्माता, वितरक आणि सादरकर्ता राहिले आहेत. यामध्ये मराठीतील बापमाणूस, वेल डन बेबी, हिंदीमध्ये स्वातंत्र्यवीर  सावरकर, पीएम नरेंद्र मोदी यांसारख्या समावेश आहे. यामुळे बॉलीवूडमधील अनेक दिगज्जांनी आयपीओपूर्व गुंतवणूक केली आहे. श्री लोटस डेव्हलपर्स हे लक्झरी आणि अल्ट्रा-लक्झरी घरे विकसित करण्यासाठी ओळखले जातात. विशेषतः मुंबईच्या पश्चिम उपनगरांमध्ये त्यांनी बांधलेली घरे आहेत.