वारी एनर्जीजचा प्रत्येकी १,४२७ ते १,५०३ रुपये किमतीला ‘आयपीओ’ २१ ऑक्टोबरपासून

या माध्यमातून ४,३२१ कोटी रुपये उभारण्याची कंपनीची योजना असून, समभाग विक्रीसाठी १,४२७ रुपये ते १,५०३ रुपये असा किंमतपट्टा निश्चित केला आहे. कंपनीचे प्रवर्तक आणि विद्यमान भागधारक त्यांच्या हिस्सेदारीतील आंशिक वाटा असे सुमारे ४८ लाख समभागांची यातून विक्री करणार आहेत. तर ३,६०० कोटी रुपये मूल्याच्या नवीन समभागांची विक्री करण्यात येईल.

हेही वाचा >>>‘महाबँके’ला १,३२७ कोटींचा तिमाही नफा

वारी एनर्जीज् लिमिटेडच्या प्रारंभिक समभाग विक्रीमध्ये ५० टक्के समभाग पात्र संस्थात्मक खरेदीदारांसाठी राखीव ठेवण्यात आले आहेत. तर गैर-संस्थात्मक संस्थात्मक गुंतवणूकदारांसाठी १५ टक्के आणि ३५ टक्के समभाग किरकोळ गुंतवणूकदारांसाठी राखीव असतील. कंपनीचे समभागांची मुंबई शेअर बाजार (बीएसई) आणि राष्ट्रीय शेअर बाजारात (एनएसई) २८ ऑक्टोबरला सूचिबद्धता अपेक्षित आहे. गुंतवणूकदारांना किमान नऊ समभागांसाठी आणि नऊ समभागांच्या पटीत आयपीओसाठी अर्ज करता येईल.

डिसेंबर १९९० मध्ये स्थापन झालेली वारी एनर्जी लिमिटेड ही कंपनी सौरऊर्जा निर्मितीसाठी उपयुक्त सुटे घटक बनवते. सौरऊर्जा निर्मितीतील वर्गीकरणामध्ये मल्टीक्रिस्टलाइन मॉड्यूल्स, मोनोक्रिस्टलाइन मॉड्यूल्स आणि टॉपकॉन मॉड्यूल्सचा समावेश आहे, ज्यामध्ये फ्रेम केलेल्या आणि अनफ्रेम केलेल्या दोन्ही प्रकारच्या लवचीक बायफेशियल मॉड्यूल्स तसेच बिल्डिंग-इंटिग्रेटेड फोटोव्होल्टेक मॉड्यूल असतात.