दक्षिण अफ्रिकेच्या जोहान्सबर्ग येथे पाच मजली इमारतीत मध्यरात्री लागलेल्या आगीत जवळपास ७३ जणांचा होरपळून मृत्यू झाला आहे. मृतांमध्ये सात लहान मुलांचा समावेश असल्याचीही माहिती समोर येत आहे. तर, काहींचे मृतदेह ओळखण्यात यंत्रणा अयशस्वी ठरल्या आहेत.

या अपघातात जवळपास ४३ जण जखमी झाले असून त्यांच्यावर स्थानिक रुग्णालयात उपचार सुरू आहेत. आपत्कालीन व्यवस्थापन सेवांचे प्रवक्ते रॉबर्ट मुलाउडझी यांनी दिलेल्या माहितीनुसार, मृतांमध्ये दोन वर्षाच्या बाळाचाही समावेश आहे. घटनेची माहिती मिळताच अग्नीशमन दल घटनास्थळी दाखल झाले असून आग विझवण्याचे शर्थीचे प्रयत्न सुरू आहेत. तसंच, बचावकार्यही सुरू करण्यात आले आहे.

जळालेल्या मृतदेहांना बाहेर काढण्याचं काम सुरू

पाच मजल्याची इमारत असल्याने प्रत्येक मजल्यावर आम्ही बचावकार्य सुरू केलं आहे. जळलेल्या मृतदेहांना बाहेर काढण्याचं काम सुरू असून त्यांना रस्त्यावर ब्लँकेट किंवा चादरीवर ठेवले जात असल्याची माहिती स्थानिक वृत्तसंस्थांनी दिली आहे.

गेल्या २० वर्षांत एवढी मोठी घटना घडली नव्हती. जोहान्सबर्ग शहरासाठी हा खरंच दुःखाचा दिवस आहे, असं मुलाउद्झी म्हणाले. रात्रभर लागलेली ही आग नेमकी कशामुळे लागली हे अद्याप स्पष्ट झालेले नाही. मेणबत्तामुळे ही आग लागली असावी असा प्राथमिक अंदाज महापौर Mgcini Tshwaku यांनी वर्तवला आहे.

This quiz is AI-generated and for edutainment purposes only.

इमारतीचा गेट बंद असल्याने लोकांचा मृत्यू

आग लागली तेव्हा या इमारतीत अनेकजण होते. अनेक लोक बेकायदा या इमारतीत असल्याचंही आढळून आलं आहे. इमारतीच्या आतील एक गेट बंद असल्याने आग लागल्यानंतर लोकांना बाहेर पडता आलं नाही. त्याच गेटवर अनेकांचे जळालेले मृतदेह सापडले आहेत, अशी माहिती महापौरांनी दिली.