“…तर समाज वेडा होईल”, महिलांच्या मद्यसेवनाबाबत पोलीस अधिकाऱ्याचे वादग्रस्त वक्तव्य

“मुले चुकीची कामे करतील. त्यांना थांबवणे महिलांचे काम आहे. पण आता महिलाच दारू पिऊन उद्रेक करत आहेत. यामुळे समाजाचे नुकसान होत आहे”, असे व्हिडिओमध्ये पोलीस अधिकारी म्हणताना ऐकू येत आहे.

हा व्हिडिओ पश्चिम बंगालमध्ये मोठ्या प्रमाणात साजरा केला जाणारा सण जगधात्री पूजेच्या आयोजकांसोबत झालेल्या बैठकीत रेकॉर्ड करण्यात आला आहे.

आपल्या भाषणात पोलीस अधिकारी हलदर म्हणाले की, गेल्या वर्षीच्या कालीपूजेच्या मिरवणुकीत दारू पिऊन सहभागी झालेल्या तरुणींना पाहून त्यांना “लाज” वाटली.

“मला हे सांगायला लाज वाटते की, गेल्या वर्षीच्या कालीपूजेच्या वेळी, मिरवणुकीत तरुणींमध्ये दारू पिण्याचे प्रमाण सर्वाधिक असल्याचे आपण पाहिले आहे. मुली रस्त्यावर उभ्या राहून दारू पित होत्या. हे मिरवणुकीचे सौंदर्य आहे का? मी या मिरवणुकीचा निषेध करतो”, असे हलदर म्हणाले.

“जर घरातील महिला अशा वागल्या तर समाज वेडा होईल. मुलांनी गैरवर्तन केले तर त्यांना थांबवण्याचे काम महिलांचे आहे. पण जर त्या मुलीच अशा गोष्टी करत असतील तर समाज कुठे जाईल हे तुम्हाला समजू शकते”, असे ते पुढे म्हणाले.

पोलीस सूत्रांनुसार, त्यांच्या वक्तव्याबद्दल अधिकाऱ्यावर अद्याप कोणतीही कारवाई झालेली नाही.

एमबीबीएस विद्यार्थिनीवरील बलात्काराचे प्रकरण

पश्चिम बंगालमधील दुर्गापूर येथील एका वैद्यकीय महाविद्यालयाजवळ २३ वर्षीय एमबीबीएस विद्यार्थिनीवर झालेल्या सामूहिक बलात्काराच्या घटनेवरून जनतेत संताप व्यक्त होत आहे. त्या घटनेच्या काही दिवसांतच हा वाद निर्माण झाला आहे.

मुख्यमंत्री ममता बॅनर्जी यांनी विद्यार्थ्यांच्या सुरक्षेची जबाबदारी खाजगी संस्थांवर टाकल्याने आणि त्या प्रकरणावर त्यांनी दिलेल्या प्रतिक्रियेबद्दल त्यांच्यावर जोरदार टीका झाली होती.

“ती एका खाजगी वैद्यकीय महाविद्यालयात शिकत होती. ती कोणाची जबाबदारी आहे? ती रात्री १२.३० वाजता कशी बाहेर पडली? खाजगी वैद्यकीय महाविद्यालयांनी त्यांच्या विद्यार्थ्यांची काळजी घेतली पाहिजे. त्यांना बाहेर पडू दिले जाऊ नये”, असे ममता बॅनर्जी म्हणाल्या होत्या.