‘लालूंचे पाप लपवण्याचा प्रयत्न’ पंतप्रधान मोदी यांचा तेजस्वी यादव यांच्यावर हल्लाबोल

कटिहार येथे झालेल्या सभेत मोदी यांनी लालूप्रसाद यादव किंवा तेजस्वी यादव यांचे नाव घेतले नाही. मात्र, त्यांनी ‘जंगल राज के युवराज’ हा नेहमीचा शब्दप्रयोग वापरला. “राजदच्या फलकांवर स्वतःच्या पित्याची छायाचित्रे न लावून ते कोणते पाप लपवत आहेत, त्यांना तुम्ही एवढा मोठा नेता मानता आणि ते अनेक वर्षे मुख्यमंत्री होते. कारण त्यांच्याबरोबर जंगल राजचे ओझे आहे, याची त्यांना जाणीव झाली असावी,” अशा शब्दांमध्ये मोदींनी यादव पिता-पुत्रांवर हल्ला चढवला.

घुसखोरांच्या हकालपट्टीचे आश्वासन

दरभंगा, मुझफ्फरपूर, सरण : बिहारमध्ये ‘रालोआ’ची सत्ता आली तर राज्यातून घुसखोरांची हकालपट्टी केली जाईल, तसेच त्यांची सत्ता गरिबांमध्ये वाटून टाकली जाईल, असे आश्वासन उत्तर प्रदेशचे मुख्यमंत्री योगी आदित्यनाथ यांनी सोमवारी दिले. योगींनी दरभंगा, मुझफ्फरपूर, सरण या जिल्ह्यांमध्ये पाठोपाठ सभा घेतल्या. त्यावेळी त्यांनी काँग्रेस नेते राहुल गांधी, राजदचे तेजस्वी यादव आणि सपचे अध्यक्ष अखिलेश यादव यांचा उल्लेख ‘इंडियाची तीन माकडे’ असा केला. या तिघांना ‘रालोआ’ने केलेली चांगली कामे दिसत नाहीत, त्याबद्दल ते ऐकायला तयार नाहीत आणि त्याबद्दल ते बोलू शकत नाहीत, असे योगी आदित्यनाथ म्हणाले.

पंतप्रधानांना ‘अपमान मंत्रालय’ सुरू करावे

सहरसा : पंतप्रधान नरेंद्र मोदी विरोधकांवर देशाचा आणि बिहारचा अपमान केल्याचा सतत आरोप करतात, त्यांनी आता ‘अपमान मंत्रालय’ सुरू करावे, अशी खोचक टीका काँग्रेस नेत्या प्रियंका गांधी यांनी सोमवारी केली. सहरसा जिल्ह्यातील सोनाबरसा येथे जाहीर सभेत बोलताना, प्रियंका यांनी मोदींना लक्ष्य केले. ते नेहमी खऱ्या मुद्द्यांपासून भरकटत असतात, अशी टीका त्यांनी केली. त्या म्हणाल्या, “विकासाबद्दल आणि गेल्या दोन दशकांमध्ये रालोआने कोणती कामे केली याबद्दल बोलण्याऐवजी ते प्रत्येक विरोधी नेत्यावर देशाचा आणि बिहारचा अपमान केल्याचा आरोप करतात. त्यांनी ‘अपमान मंत्रालय’ हे नवीन मंत्रालय सुरू करावे, कारण त्यांचे सरकार त्यावर सर्वाधिक लक्ष केंद्रित करते.”