बिहारमध्ये भ्रष्टाचाराचा कहर… इंजिनीअरने शेडमधील रेल्वे इंजिन परस्पर विकलं; शिपायाच्या तक्रारीनंतर खुलासा

स्थानिक प्रसारमाध्यमांनी दिलेल्या माहितीनुसार या प्रकरणामधील इंजिनिअरने डीएमआयची सही, शिक्का असलेला खोटा कागद दाखवून नॅरोगेज लाइनवर चालणारे वाफेचं इंजिन विकलं. या प्रकरणाची माहिती कोणाला लागू नये म्हणून एका पोलिसाच्या मदतीने रेल्वेच्या शेडमध्ये एका पिकअप व्हॅनची नोंदही या इंजिनीअरने करुन घेतली. मात्र या शेडमधील शिपायाने केलेल्या तक्रारीनंतर इंजिनीअरच्या या घोटाळ्याचा भांडाफोड जाला.

१४ डिसेंबर २०२१ रोजी इंजिनीअर राजीव रंजन झा यांनी हेल्पर सुशील यादवच्या मदतीने गॅस कटरच्या मदतीने जुन्या इंजिनचे काही भाग कापत होते. यावेळेस तेथे नियुक्त असणारे प्रभारी एम. एम. रहमान यांनी या कामासंदर्भात विचारणा केली असता इंजिनीअरने खोटं पत्र दाखवून या इंजिनाला भंगारात काढण्यात आलं असून त्याचे भाग पुन्हा डीझेल शेडमध्ये पोहचवायचे असल्याचं सांगितलं. दुसऱ्या दिवशी संगीता या देखरेख करणाऱ्या दुसऱ्या शिपाई कामावर पोहचल्या तेव्हा त्यांनी रजिस्टरमधील नोंदी तपासून पाहिल्या. त्यामध्ये एक भंगार पिकअप करणारी व्हॅन आल्याचं नमूद करण्यात आलेलं. मात्र नंतर संगीता यांनी डिझेल कारशेडमध्ये तपास केला असता या इंजिनचं भंगार तिथे पोहचलं नव्हतं. यासंदर्भातील माहिती संगीता यांनी वरिष्ठ अधिकाऱ्यांना दिल्यानंतर एकच खळबळ उडाली. तपास केला असता डीएमआयने इंजिन भंगारात काढण्याचे आदेश दिलेच नसल्याचं स्पष्ट झालं.

खोटा आदेश दाखवून इंजिन कापण्याचा प्रयत्न करणाऱ्या इंजिनीअरचा अता शोध घेतला जात आहे. तसेच ज्या पिकअप व्हॅनची नोंद करण्यात आली तिचाही शोध घेतला जात आहे. हे प्रकरण समोर आल्यानंतर डीआरएमच्या आदेशानुसार संबंधित इंजिनीअर, हेल्पर आणि डीझेल कारशेडवर तैनात असणाऱ्या वीरेंद्र द्विवेदी यांना नोकरीवरुन काढून टाकण्यात आलंय.

समस्तीपुर विभागाच्या सुरक्षा विभागाचे आयुक्त ए. के. लाल यांनी दिलेल्या माहितीनुसार एम. एम. रहमानला डिझेल शेडमधील भंगाराच्या सामानाचं जे पत्र दाखवण्यात आलं त्या संदर्भात चौकशी सुरु केली असता असं पत्र जारी करण्यात आलं नव्हतं असं समोर आलं. मागील दोन दिवसांपासून रेल्वेचे अधिकारी या इंजिनीअरचा आणि त्या पीकअप ट्रकचा तपास शोध घेत आहेत.