हुंडा नको म्हणत मुलगा लग्नाला तयार, पण दागिने कमी म्हणून नवरीचा फेऱ्यांना नकार; भर मंडपातून नवरदेवानं गाठलं पोलीस ठाणं!

नवरदेवाने कमी दागिने आणि खूप कमी भेटवस्तू आणल्या आहेत असं म्हणत एका नवरीने सात फेरे घेण्यास नकार दिला. त्यानंतर नवरदेव थेट पोलीस ठाण्यात गेल्याचं प्रकरण समोर आलं आहे. कानपूर देहातच्या सिकंदरा पोलीस ठाणे क्षेत्रातील एक विचित्र घटना समोर आली आहे. दागिने कमी आणल्यामुळे नवरी संतापली आणि तिने फेरे घेण्यास नकार दिला. परिणामी हे लग्न मोडलं, तसेच वऱ्हाड घरी परतलं.

कानपूर देहातमधल्या बनवारी गावातील रहिवासी असलेल्या श्याम नारायण यांच्या मुलीचं मानपूर गावातील लाला राम यांच्या मुलाशी लग्न ठरलं होतं. या लग्नात कोणत्याही प्रकारचा हुंडा घेतला जाणार नाही असं ठरलं होतं. त्यानंतर २९ एप्रिल रोजी वऱ्हाड दारात आल्यावर मुलीकडच्या लोकांनी वऱ्हाडाचं स्वागत कलं. त्यानंतर द्वारपूजा आणि जयमाला विधी झाले. सर्वकाही सुरळीत सुरू होतं. परंतु रात्री नवरीने अचानक लग्नास नकार दिला.

काय म्हणाली नवरी?

त्यानंतर मुलाकडच्या मंडळींनी नवरीची मनधरणी सुरू केली. परंतु नवरी म्हणाली, “इतके कमी दागिने घेऊन मी लग्न करणार नाही. तुम्ही दागिने आणि भेटवस्तू खूप कमी आणल्या आहेत. जर तुम्हाला हे लग्न हवं असेल तर आधी दागिने घेऊन या, अन्यथा वऱ्हाड घेऊन परत फिरा.”

हे ही वाचा >> सासूने सुनेला दोन प्रियकरांबरोबर आक्षेपार्ह स्थितीत पकडलं, बेडरूमला बाहेरून कुलूप लावून…

नवरीच्या आक्रमक पवित्र्यानंतर नवरदेवाने पोलीस ठाणं गाठलं. त्यानंतर पोलिसांनीदेखील नवरीला समजावलं. परंतु त्याचा काहीही परिणाम झाला नाही. अखेर नवरदेव वऱ्हाड घेऊन माघारी परतला. दरम्यान, एकीकडे हुंडा मागणाऱ्या मुलांवर कारवाई होते, अशा वेळी दागिन्यांसाठी लग्न मोडणाऱ्या या नवरीवर पोलिसांनी कारवाई का केली नाही, असा प्रश्न उपस्थित करण्यात आला आहे.