डोनाल्ड ट्रम्प यांना शांततेचा नोबेल पुरस्कार नाकारल्याने व्हाईट हाऊसचा संताप; म्हणाले, “त्यांनी राजकारणाला…”

“राष्ट्राध्यक्ष डोनाल्ड ट्रम्प शांतता करार करत राहतील, युद्धे संपवतील आणि जीव वाचवतील. त्यांच्याकडे मानवतेचे हृदय आहे आणि त्यांच्यासारखा कोणताही व्यक्ती इच्छाशक्तीच्या जोरावर पर्वतही हलवू शकतो”, असे व्हाईट हाऊसचे प्रवक्ते स्टीव्हन च्युंग यांनी एक्स वर लिहिले आहे.

नोबेल शांतता पुरस्काराच्या घोषणेपूर्वी डोनाल्ड ट्रम्प यांनी अमेरिकेचे माजी राष्ट्राध्यक्ष बराक ओबामा यांच्यावर टीका केली होती. ते म्हणाले होते की, “बराक ओबामा यांना हा पुरस्कार कोणतेही काम न केल्याबद्दल आणि आपला देश उद्ध्वस्त केल्याबद्दल मिळाला आहे. ओबामा चांगले राष्ट्राध्यक्ष नव्हते.” २००८ मध्ये, अमेरिकेचे राष्ट्राध्यक्ष झाल्यानंतर आठ महिन्यांनी बराक ओबामा यांना शांततेचा नोबेल पुरस्कार देण्यात आला होता.

डोनाल्ड ट्रम्प जी आठ युद्धे संपवण्यात महत्त्वाची भूमिका बजावल्याचा दावा करतात त्यामध्ये मे महिन्यात झालेला भारत-पाकिस्तान लष्करी संघर्षाचाही समावेश आहे. ट्रम्प यांनी वारंवार दावा केला आहे की, त्यांनी या दोन्ही देशांत मध्यस्थी करून अणुयुद्ध रोखले. परंतु भारताने सातत्याने असे म्हटले आहे की, भारत-पाकिस्तान शस्त्रबंदी करारात कोणत्याही तिसऱ्या पक्षाचा हस्तक्षेप नव्हता.

कोण आहेत मारिया कोरिना मचाडो?

२०२५ चा नोबेल शांतता पुरस्कार व्हेनेझुएलाच्या नेत्या मारिया कोरिना मचाडो यांना जाहीर झाला आहे. त्या एक प्रसिद्ध राजकीय नेत्या आहेत. त्यांनी त्यांच्या देशात लोकशाही आणि मानवी हक्कांसाठी सातत्याने लढा दिला आहे. मारिया कोरिना यांचा जन्म ७ ऑक्टोबर १९६७ रोजी व्हेनेझुएलाची राजधानी कराकस येथे झाला. त्यांचे वडील हेन्रिक मचाडो हे एक उद्योगपती होते आणि तिची आई कोरिना पॅरिस्का या मानसशास्त्रज्ञ होत्या.