आयातशुल्कवाढ बेकायदा, ट्रम्प यांना अधिकार नाहीत; अमेरिकी न्यायालयाचा निकाल

अमेरिकेच्या ‘कोर्ट ऑफ अपील्स फॉर द फेडरल सर्किट’च्या च्या न्यायाधीशांनी ७ विरुद्ध ४ अशा बहुमताने दिलेल्या निकालात असे नमूद करण्यात आले आहे की, ट्रम्प यांना राष्ट्रीय आपत्कालीन परिस्थिती जाहीर करण्याचा आणि जगातील जवळपास प्रत्येक देशावर आयातशुल्क लादण्याचा अधिकार नाही. यापूर्वी मे महिन्यात न्यूयॉर्कमधील विशेष फेडरल ट्रेड न्यायालयाने अशाच स्वरूपाचा निकाल दिला होता. “ट्रम्प यांना आयातशुल्क लादण्याचे अमर्यादित अधिकार देण्याची काँग्रेसची इच्छा आहे असे दिसत नाही,” असे मत न्यायालयाने व्यक्त केले. मात्र, न्यायालयाने आयातशुल्क तातडीने रद्द करण्याचे निर्देश दिले नाहीत. फेडरल न्यायालयाने या निकालाविरोधात सर्वोच्च न्यायालयात अपील करण्यासाठी ट्रम्प प्रशासनाला वेळ दिला आहे.

दरम्यान, या प्रकरणी प्रशासनाचा अंतिम विजय होईल अशी आशा व्हाइट हाऊसचे प्रवक्ते कुश देसाई यांनी व्यक्त केली. ट्रम्प यांनी कायदेशीरपणेच कृती केली आहे असे ते म्हणाले. तर या निकालाला आव्हान दिले जाईल असे ट्रम्प यांनी समाजमाध्यमावर पोस्ट लिहून स्पष्ट केले.

फेडरल न्यायालयाचा निकाल कायम राहिला तर त्यामुळे अमेरिका अक्षरशः उद्ध्वस्त होईल. – डोनाल्ड ट्रम्प, अध्यक्ष, अमेरिका